1 Aak Sunday ngulan wun-a, aakan kan-kanang pach-pacham-a, nil Mary Magdalene.an aak kunttow awar aakanak nguch, aꞌ kunttow thaaꞌan yaꞌ-yaꞌam thath, kunttow awaran thaaꞌ paꞌant wun. 2 Aꞌ nil Mary.an kamp ngul moꞌ, Simon Peter.ant, aꞌ ngurp Jesus.antam thon alantan, pam nil Jesus.an kaangk wun nungant, aꞌ nil waaꞌ pulant, “Than moom ngamparam nath kalin nunang a! kunttow awar anpalan. Than wanttinak yaakaꞌ kalin nunang a?” 3 Aꞌ pul Peter-a, ngurp thonangan Jesus.antaman kamp moꞌ-moꞌpul kunttow awar aakanakan. 4 Pul karp kanan moꞌ-moꞌpul-a, puth ngulan-a, Peter.an koy-koyyuw moꞌ, nil-nungantan-a, umputh pent, kaꞌatham wamp kunttow awar aakanakan. 5 Nil thuch-a, iim, aꞌ ngook nunangan kathin thath thanang angman wun-wunin, puth nil keꞌam ngoonch. 6 Aꞌ nil Simon Peter.an ngul wamp, koy-koyyuw, aꞌ nil pek wupam ngoonch, kunttow awar angan. Aꞌ nil thath-thath ngook anangan angman wun-wunin, 7 aꞌ puth ngook kuchekan kathin nunang angman pokkapang montanpekan wun. 8 Aꞌ nil pam thonan-a, kaꞌathaman wamp kunttow awar aakanakan-a, nil ngul ngoonch. Nil ngook anangan thath-thath thanang, aꞌ nil kan-ngul thiich Jesus.an kan-kanam mulaman ek. 9 Than puth kaꞌathaman wik Jesus.antaman min-min keꞌam ngeeyin, wuthanang wun thant, wik lat ngench thayan anpalan, keenkanaman umpin, wik yimanangan: nil kan-kanam ngul ekow mulaman. 10 Aꞌ pul koyam iiypul aakak.

11 Pul kanan iiypul-a, nil Mary ngul wamp. Nil yoon than-than, kunttow awar thinth peey-peey. Nil thuch-a, peey-peey, pek thath-thath, kunttow awarang, 12 aꞌ ngaantiyongk kucham God.antam thath pulang, ngook pachang nyiin-nyiinpul angman, aak mookang. Ngaantiyongk thonaniy-a, Jesus.an kuchek wun-a, aak angman nyiin; aꞌ thonanganan-a, Jesus.an thaꞌ wun-a, aak angman nyiin-nyiin. 13 Pul ngaantiyongk anangan thawpul nungant, Mary.ant, “Ayyang, nint ngeenam peey-peeyangan ee?” Nil Mary.an thaw, “Than moom ngatharaman maayin nunang a! Wanttin yaakaꞌ kalin nunang a? ngay puth ngoongk-ngoongkam a!”

14 Nil wik inangan kanan thaw pulant-a, nil manyam weent, aꞌ paman meeꞌ kiirkang thathan nunang, kul-kulam than-than. Nil Mary.angan keꞌ pam thonangan yimanangan ngaantam-ngeey nunang, puth yaꞌ, nil Jesus anman kum-kuman. 15 Aꞌ nil Jesus.an thawant, “Ayyang, nint ngeenam peey-peeyangan ee? Nint weeꞌantak wenk-wenkangan ee?” Puth nil Mary.angan ngaantam-ngeey keꞌ pam gardenan piꞌ-piꞌan, keꞌ-paal nilan thawant, Jesus.ant, “Ayyang, aak inpalan nint kalan nunang ey? Nintwey nath kalan nunang-a, nint waaꞌānar aak wanttinakan kalan nunang, ngay yipam uwāng nunang.” 16 Aꞌ nil Jesus.an thawant, “Mary-ang!” Aꞌ nil weent um nungant Jesus.ant, aꞌ wik Hebrew.ang thaw nungant, wik nungantamang, “Ayyang, Rabboni! In nintam ey!” Wik Rabboni.an-a, wik ngamparamangan-a, teacher waaꞌanamp. 17 Aꞌ nil Jesus.an thawant, “Keꞌ mamān ngayanga! puth ngay keꞌam yippak kenya matangan piip ngatharamantan. Puth nint iiyān ngurp ngatharam al-alantan, than puth keꞌ kuunch ngatharam yimanangan, aꞌ wik yimanangan thawān thant, ‘Ngay keny matāng God.ant, nilan puth piip ngatharama, puth piip niiyantam thampang, God ngatharama, aꞌ puth God niiyantam thampang.’ ” 18 Aꞌ nil Mary Magdalene.an iiy ngul aꞌ thaw thant, ngurp Jesus.antam al-alantan, “Ngay moom ngamparam kan uwangan nunang a!” Aꞌ wik nil Jesus.angan kuch thant-a, nil Mary.angan-a, waaꞌ-waaꞌ ngul thant.

19 Sunday ngutang ngulan-a, ngurp Jesus.antam anangan thonamang yalmathwin, aawuch thaaꞌ ngathanang nyiin-nyiinin. Than thaaꞌan-a, ngathin, yuk key.ang, than puth winynyang moꞌin Jews al-alantaman. Aꞌ nungkway than aawuch thaaꞌ ngathanangan nyiin-nyiinin-a, nil Jesus.an angman wamp thant, angman than, aꞌ thaw thant, “Niiyalang! Niiy in ey?” 20 Wik inangan kanan thaw-a, nil maꞌ wench meenath thant, aꞌ engk-thaaꞌ wenchan meenath thant. Than Lord Jesus.an thathin nunangan-a, ngangk min paththam ngul wun thant. 21 Aꞌ nil Jesus.an thaw thant, “Ngangk min wunow niiyant a! Keꞌ piip ngatharamangan kuchany-a, ngay yimanang niiyangan kuchānga.” 22 Wik inangan kanan thaw-a, nil Jesus.an thaaꞌ manyam ik, aꞌ ngangkang theeꞌ thant, Ngeen-Wiy Min God.antaman yipam ngangkang ngoonchow thanttang, aꞌ nil thaw thant, “Ngeen-Wiy Min God.antaman ngangkang ngoonchow niiyantang a! 23 Anpalan-a, niiy nath thawin thant pam wanch al-alantan-a, ‘Kana, ngan keꞌ-ngul ngaantam-ngeeyān way niiyan iiy-iiyan, yaꞌa,’ an puth God.angan yimanang keꞌ-ngul ngaantam-ngeeyow way thanan iiy-iiyin. Puth niiy nath thawin thant-a, ‘Yaꞌa, nganang keꞌ kon-ngathow niiyan way iiy-iiyan,’ an puth God.angan yimanang keꞌ kon-ngathow thanan way iiy-iiyin.” Aꞌ nil Jesus.angan kan-ngul want thanang.

24 Nil Jesus.an kaꞌathaman wamp thant ngurp nungantam al-alantan-a, nil Thomas.an ang yaꞌa. (Namp thon nungant-a, Puk Um Kucham, “Twinan” waaꞌantan.) 25 Aꞌ than ngurp wiy al-alangan waaꞌin nungant, Thomas.ant, “Ngan Lord kan thathan a!” Aꞌ nil Thomas.an thaw thant, “An ngay meeꞌ ngatharamangan thathing maꞌ wench nailangan pungin nunang-a, aꞌ maꞌ wunping wench thaaꞌanganwey-a, aꞌ puth maꞌ engk-thaaꞌangan wunping nungantangwey-a, an ngay ep kan-kanam ngaantam-ngeeying nil mulaman kan ek. Nath yaꞌwey-a, ngay keꞌ ngaantam-ngeeying nil mulaman ek, yaꞌa.”

26 Week thonang ngulan-a, ngurp Jesus.antaman karpam nyiin-nyiinin aawuchangan. Nil Thomas.an-a, thanttang angman nyiin-nyiin. Aꞌ nungkway than aawuch thaaꞌ ngathanangan nyiin-nyiinin-a, nil Jesus.an angman wamp thant, aꞌ angman than, aꞌ thaw thant, “Niiy in ey? Yaa, ngangk min wunow niiyanta.” 27 Aꞌ nil Jesus.an-a, Thomas.ant thaw ngul, “Maꞌ inangan thath a! Aꞌ maꞌ puk nungkaraman maꞌ wench thaaꞌang ingan wunpān a! Aꞌ nint maꞌ pal ongkaratha, engk-thaaꞌ ingan wunpān a! Nint keꞌ-ngul man-ngeeyān ngayang, yaꞌa! Nint kan-kanam ngul ngaantam-ngeeyān ngay mulaman ekangan a!” 28 Aꞌ nil Thomas.an thawant, “Nint in Lord ngatharama, God ngatharama!” 29 Aꞌ nil Jesus.an-a, Thomas.ant thaw, “Nint ngayang ngurp thathan, aꞌ nanpalan nint ngaantam-ngeeyangan ngay mulaman ekangan. Nungkway than wiy al-alangan ngurp keꞌ thathayn ngayang-a, an than ngul ngaantam-ngeeyayn ngay mulaman ekangan. Than anangan-a, ngangk min paththam ngul wunayn.”

30 Nil Jesus.angan-a, work piꞌan min-miniy anangan yump-yump yot anangan, meeꞌ ngurp nungantam al-alantangan, puth wik kath wiy keꞌ umpanam lat ingan. 31 Wik kath inangan Jesus.antaman umpangan, niiy yipam kan-kanam ngaantam-ngeeyān nunang nilan puk nhengk God.antam, God.angan kuch nunang, aꞌ puth-a, niiy yipam ngangk punch-aakam theeꞌān nungant. Puth nil Jesus.an wamp aak iikanakan, yipam kaaꞌ-piichanathow niiyang, niiy yipam maꞌ God.antang inpalman iiy-iiyān, aꞌ puth ngul-ngulakam.