1 John.
5.
Than weeꞌ-weeꞌanangana Jesus.an ngaantam-ngeeyiythan nunanga nil pam anmana nil God.angan keenkanaman kaaꞌngak nunang kuchowan ngampar-a, nil God.angana puk nungantam waaꞌow thananga. Aꞌ than weeꞌ-weeꞌanangan kaangk wuntan piip God.antan-a, yimanang than pam wanch nungantam al-alantan thamana kaangk wunayn thanta. 
Ngamp nathwey God.antan kaangk paththam wunimp-a, puth wik nungantaman keꞌ-ngoongkam ngeey-ngeeyimp-a, yaa, an ngamp meeꞌmiy ngamparakam ngampan kan-kanam pam wanch nungantam al-alantan kaangk wun-wunanamp thanta. 
Ngamp puth God.antan kaangk wunimp-a, yaa, ngampaniya wik nungantaman keꞌ-ngoongkam anman ngeey-ngeeyāmpa! Wik nungantam anangan thayan keꞌam wunan ngampar yaꞌa, wik min paththam anman wunan ngampar. 
Puth ngamp weeꞌ-weeꞌanangan puk God.antaman iiy-iiyanamp-a, ngamp oony way piꞌanan thaamp-thaampanamp nunanga, wik keꞌ ngeey-ngeeyanamp nunang, yaꞌa. Ngamp puth Jesus Christ.an ngangkangan piꞌ-piꞌanamp nunanga, nilaniy-a, maꞌ-aath-aathan ngampanga yipam oony way piꞌanan thaamp-thaampāmp nunanga, wik keꞌ yipam ngeeyāmp nungantamana. 
Nil puth weeꞌangam nath um thaampowan oony way piꞌanan e? Yaꞌa! Ngamp-ngampaman keꞌ thaampimpana! Puth ngamp weeꞌ-weeꞌanangan Jesus.an ngaantam-ngeeyāmp nunang nilan nhengk God.antaman-a, an ngamp ep um thaamp-thaampāmp nunang, oony way piꞌananiya. 
Nil Jesus Christ.ana aak iikanakan uk, aꞌ nil John.angana kuchek ngakangan kuungk nunanga, puth inan thonakam yaꞌa, anpalan-a, than mulathin nunanga aꞌ nil chaapar nungantaman theetath way ngamparamakana. Nil Ngeen-Wiy Min God.antamangana waaꞌ-waaꞌan ngampar wik anangan Jesus.antamana kan-kanamana. Nil Ngeen-Wiy anana wik keꞌam uuy-uuyamana, yaꞌa, nil kan-kanam anman thaw-thawana. 
Koꞌalam il-ilangan-a, Ngeen-Wiy God.antamangan-a, puth ngakangan kootra kuungkan-a, puth chaaparan-a, al-alangan kan-kanam meen-meenathantan ngampara Jesus.an nhengk nungantam God.antamana. 
Ngamp wik ngeey-ngeeyanamp thananga, pam wanchangan waaꞌ-waaꞌantan ngampara, puth wik nil God.angan waaꞌ-waaꞌan ngampar-a, an min-minam ngeeyāmp paththama, nil puth pam piꞌan paththam, nilaniy-a, kan-kanam waaꞌan ngampar nhengk nungantam alantamana. 
Than weeꞌ-weeꞌanangan nhengk God.antaman ngaantam-ngeeyayn nunang-a, an than Christ.ana ngangkangan kan-kanam piꞌ-piꞌantan nunang nilan nhengk God.antaman. Than weeꞌ-weeꞌanangan God.an keꞌaman ngaantam-ngeey-ngeeyantan nunang-a, an than yaan thaw-thawantan thanttakamana keꞌ Jesus.an nhengk God.antaman keꞌ yaꞌana, nil God.ana keꞌ wik yimanangan uuy-uuyaman, puth yaꞌa, than pam anangaman yaan wik uuy-uuyamantan than-thanttakama puth thanan kan-kanam keꞌam ngaantam-ngeey-ngeeyantan wik nil God.angan waaꞌ kan-kanam nhengk nungantam alantamana. 
Nil God.angana wik inangan waaꞌa: nil ngangk ngulakam ngul theeꞌow ngampar, nil Jesus.angan maꞌ nungantangan piꞌ-piꞌow ngampang, ngampaniy-a, nungantangan ngulakam wunāmpa, aak umpuyangama, puth nil kanam kaaꞌ-piichanath ngampanga. 
Ngamp weeꞌ-weeꞌanangan nhengk God.antaman ngangkangaman piꞌ-piꞌanamp nunang-a, an ngamp aak umpuyangam ngul wunāmp God.antangana, puth ngamp weeꞌ-weeꞌanangan keꞌaman nhengk God.antaman ngangkangan piꞌ-piꞌanamp-a, an ngamp aak umpuyangam keꞌ wunāmp God.antangan, yaꞌa. 
Ngay lat inan umpang niiyanta niiy yipam meeꞌmiy iiyān niiy maꞌ God.antangan ngul wunān ngulakamana, niiyan puth nhengk God.antaman ngangkangana piꞌ-piꞌaniy nunanga. 
Ngamp nathwey puk God.antam-a, ngamp meeꞌmiy nil kan ngeey-ngeeyan ngampanga, ngamp keꞌ-paal ngangk thay-thayanam thawanamp nunganta. Nil kan-kanam ngeeyan ngampang ngamp ngeenak nathwey thawanamp nunganta, ngampaniya puth wik minakan thawāmpant, keꞌ nil anana wik minan waaꞌ-waaꞌan ngampara. 
Ngamp kan-ngul meeꞌmiya, ngamp ngeenak nathan thawāmp nungantwey-a, nilan-a, ngul ngeeyow ngampanga. Ngamp inan thampan meeꞌmiy ngula, ngamp ngeenak nathan thawāmp nungant-a, nilan-a, ngul theeꞌow ngampara. 
Niiy nath Christian thonan thathin nunanga wayan yump-yumpan-a, niiyana meeꞌ-wuthanamān nunganta. Anpalan-a, nil God.angan ngul kaaꞌ-piichanathowa aꞌ thayanathowana. Puth pam wanch wiy al-alangan puy-puyam paththam way yump-yumpantana, keꞌ-ngoongkam anmana. Than keꞌ-paal way-wayam iiy-iiyantana, than thanttakama woyan mulakan wak-wakantan, aak way aakanakana. Ngay keꞌ thawing niiyanta meeꞌ-wuthanamān thantana. 
Way yotam anangan yump-yumpanamp-a, an way meeꞌ God.antangana! Puth ngamp way anangan wantāmp-a, aꞌ God.ant wampāmp-a, nil keꞌ ngaantam-ngeeyow way ngamparam anpalana. 
Ngamp puth meeꞌmiy ngula ngamp weeꞌ-weeꞌanangan puk God.antaman iiy-iiyanamp-a, an ngamp wayan keꞌ yump-yumpāmp, yaꞌa; puth nil nhengk God.antam alangana ep maꞌ-keeꞌ-wunpan ngampara, nil oony way piꞌan alangan keꞌ yipam wayathow ngampang. 
Ngamp puth meeꞌmiy ngul ngampaniy-a, puk God.antamana, puth wiy anangan yaꞌa, nil oony way piꞌan alangana maꞌ nungantangan piꞌ-piꞌan thanang, yot anangana. 
Ngamp meeꞌmiy ngul nil nhengk God.antamana inpal kenyan uk ngampara, ngamp yipam God.an min-minam ngaantam-ngeey-ngeeyāmp nunanga, puth kan-kanam thiichāmp nunanga, nil thonam anman God kan-kanam paththam, wiy yaꞌa. Yaa, ngamp iniy ngul-a, maꞌ pulantang iiy-iiyanamp, God.antang-a, putha Jesus Christ.antang, nhengk nungantamantanga. Nil inana kan-kanam God paththama. Nilam thonamangan ngangk ngulakaman piꞌ-piꞌow ngampanga. 
Puk ngatharam-ang, niiyiya yuk ngeen-wiy keꞌ thaaꞌ-kuumpān thanang, yaꞌa, yuk wayanang al-alantaman niiy kecham iiyāna, keꞌ-ngoongkam anmana! Niiy God thonakam anman ngaantam-ngeey-ngeeyāna! wiy anangan yaꞌa! Anman kan. John