19
Zilaassaa
1 GODAI Hizqqeela, “Israa7eela halaqatuyyo hagaadan yaagada zilaala;
2 ‘Intte aayyiyaa gaammotu giddon
a aiba gaammoo!
Yelaga gaammotu giddon gisada,
ba marata dichchaasu.
3 A ba maratuppe issuwaa dichchin,
wodala gaammo kiyiis.
I shankkaa tamaaridi, asaa miis.
4 Kawotettati ubbai abaa siyidi,
ollan a gelissidi oiqqidosona.
Eti a hinggittan goochchidi,
Gibxxe biitti efiidosona.
5 “ ‘A aayyiyaa naagoogee polettennan ixxin,
hidootai xayidoogaa be7ada,
ba maratuppe naa77anttuwaa dichchada,
wodala gaammo kessaasu.
6 I wodala gaammo gididi,
hara gaammotu giddon
yaanne haanne simerettiis.
I shankkaa tamaaridi, asaa miis.
7 I eta wolqqaama qatuwaa mentterettidi,
katamaakka bashshiis.
Biittainne biittan de7iya asai ubbai
a gudettan shabbirettiis.
8 Yuushuwan de7iya kawotettati ubbai
a oiqqanau piriyaa yeggidosona.
Bantta gitiyaakka miccidosona;
bantta ollan a oiqqidosona.
9 Eti bantta hinggittan a goochchidi,
koottadan giigida guutta keettan yeggidi,
Baabiloone kawuwaakko efiidosona.
Naa77antto a gudettai Israa7eela deretun siyettennaadan,
eti a qasho keettaa gelissidosona.
10 “ ‘Ne aayyiyaa haattaa doonan
tokettida woiniyaa turaa mala.
Daro haattai de7iyo gishshau,
he woiniyaa turai aifiyaa darxxaxxi uttiis;
qassi daro maratuura de7ees.
11 A maratuppe minniyaagee
haariyaageetu xam77aa gidiis.
A marai gita maratuppe aduqqidi,
bollau aadhdhiis.
Ba maratu coratettaaninne
xoqqatettan bollaara beettiis.
12 SHin he turai hanqquwan shodettidi,
biittan olettiis.
Arshsho carkkoi a aifiyaa melissiis;
a mino marai melin, tamai miis.
13 Ha77i qassi i haatti bainna
mela bazzuwan tokettiis.
14 Tamai a maratuppe issuwaa oiqqidi,
a aifiyaarakka dippi oottidi miis.
Yaatin, kawotaa xam77a gidiya
ai mino marikka a bollan attibeenna.
“ ‘Hagee yeeho zilaassa; hagaa zilaassadan go7ettanau bessees’ yaaga” yaagiis.