26
Xoossai Ba Asaassi Xoonuwaa Immana
1 He gallassi Yihudaa biittan ha yettai yexettana.
Nuuyyo mino katamai de7ees;
Xoossai atotettaa a yuushuwan gimbbedaaninne qatodan essees.
2 Ammanuwaa naagiya xillo kawotettai
gelana mala, kareta dooyite.
3 Ba qofaa nenan wottida asa
neeni polo sarotettan naagaasa;
aissi giikko, i nenan ammanettees.
4 GODAN merinau ammanetta;
aissi giikko, GODAI Xoossai merinaa Zaallaa.
5 Xoqqan de7iyaageetanne
eta xoqqa katamaa ziqqi oottiis;
i a kaushshees.
Duge biittaa gakkanau ziqqi oottees;
biittaa buhiyan oli bayees.
6 Hiyyeesaa gedee, metootanchchaa tohoi a yedhdhana.
7 Xillotu ogee salalla.
Abeet Xilluwau, neeni
xillotu ogiyaa salallissaasa.
8 Ee GODAU, ne higgiyaa ogiyan hemettiiddi,
nuuni nena naagoos.
Nu wozanaa amoi
ne sunttaa bonchchanaagaa xalaala.
9 Qamman taani nena laamotais;
ta giddon de7iya ta ayyaanai
tumuppe nena minttidi koyees.
Aissi giikko, ne pirddai sa7an de7iyo wode,
sa7an de7iya asai xillotettaa tamaarees.
10 Iita asayyo kehatettaa oottikkokka,
i xillotettaa tamaarenna.
Suure asatu biittan iitabaa oottees;
GODAA gitatettaakka erenna.
11 Abeet GODAU, neeni
ne kushiyaa xoqqu oottadasa;
shin eti be7okkona.
Ne asau neeni mishettiyo mishuwaa
be7idi yeellatona.
Neeni ne morkketuyyo wottido tamai
eta mi xaisso.
12 Abeet GODAU, neeni
nuuyyo sarotettaa minttadasa;
nu ooso ubbaa neeni nuuyyo oottadasa.
13 Abeet GODAU, nu Xoossau,
neeppe harati nuna haaridosona;
shin nuuni ne sunttaa xalaalaa bonchchoos.
14 Eti haiqqidosona;
simmidi paxa de7okkona.
Neeni qaxxayin xayido gishshau,
simmidi denddokkona.
Eti hassayettiyoobaa ubbaa qucca xaissadasa.
15 Abeet GODAU!
Neeni asaa darissadasa.
Asaa darissada, neeni bonchchettadasa;
biittaa zawaa ubbaakka aassadasa.
16 Abeet GODAU!
Metuwaa wode eti nena koyidosona.
Neeni eta qaxxayido wode,
eti nena woossidosona.
17 Abeet GODAU! SHahaarida maccaasiyaa
yeliyo wodee gakkin,
maaretan un77ettada waassiyoogaadan,
nuunikka ne sinttan hegaadan hanida.
18 Nuuni shahaarida; maaretaakka ohettida;
shin carkkuwaa yeliyaabaa gidida.
Nuuni sa7au atotettaa ehibookko;
sa7an de7iya asaakka yelibookko.
19 Haiqqida ne asai paxana;
eta ahaikka denddana.
Inttenoo, biittaa buhiyaa giddon de7iyaageetoo,
intte xaazai maallado xaazaa mala gidiyo gishshaunne,
sa7aikka haiqqidaageeta zaarettidi immiyo gishshau,
beegottitenne ufaissau yexxite.
Pirddaanne Omooduwaappe Simmiyoogaa
20 Ta asatoo, haa yiite; yiidi intte soo gelidi, kariyaa intte bolli gorddite. GODAA hanqqoi aadhdhana gakkanaassi, guutta wodiyaa inttena qosite. 21 Biittaa bollan de7iya asaa, eta nagaraa gishshau qaxxayanau, GODAI ba de7iyoosaappe kiyidi yees. Biittaikka ba bollan gukkida suuttaa qonccissana; woridoogeetakka naa77antto genttenna.