23
1 Balaami Baalaaqa, “Hagan neeni tau laappun yarshshiyo sohota gimbba; qassi laappun korima booraanne laappun dorssa orggeta neeni taayyo giigissa” yaagiis.
2 Balaami giidoogaadan Baalaaqi oottiis; eti naa77aikka issi issi yarshshiyo sohuwan issi korima booraanne issi dorssa orggiyaa yarshshidosona. 3 Hegaappe guyyiyan, Balaami Baalaaqa, “Neeni ne xuuggiyo yarshshuwaa matan hagan eqqashsha; taani gedekko bais. GODAI tanaara gaittanau geelladan yeennan aggenna. I taayyo qonccissiyoobaa aibanne taani neeyyo yootana” yaagiis. Yaagidi xoqqa booddila sohuwaa kiyiis. 4 Hegan Xoossai Balaamaara gaittin Balaami, “Taani laappun yarshshiyo sohota giigissaas; issi issi yarshshiyo sohuwan issi korima booraanne issi dorssa orggiyaa yarshshaas” yaagiis.
5 Yaagin Balaami gaanabaa GODAI ayyo yootidi, “Neeni Baalaaqakko simmada, ayyo ha hiraagaa yoota” yaagiis. 6 Yaagin i Baalaaqakko simmiyo wode, Baalaaqi Moo7aaba halaqatu ubbaara ba xuuggiyo yarshshuwaa matan eqqiis.
7 Hegaappe guyyiyan, Balaami ba hiraagaa hagaadan yaagidi yootiis;
“Moo7aaba kawoi arshsho bagga deretuppe,
Sooriyaa biittaappe tana hagaadan yaagidi ehiis;
‘Haa ya; Yaaqooba taayyo qangga!
Israa7eela asaa, “Wurite!” yaaga’ yaagiis.
8 Xoossai qanggibeennaageeta taani waata qanggoo?
GODAI, ‘Wurite!’ yaagibeennaageeta
taani waatada, ‘Wurite!’ yaagoo?
9 Taani xoqqa zaallaa huuphiyan eqqada eta xeellais;
keran eqqada taani eta be7ais.
Eti banttarkka de7iya asa;
eti banttana kawotettatuppe issuwaadan qoodokkona.
10 Baanaadan corattida Yaaqooba zerettaa ooni
qoodanau danddayii?
Harai atto Israa7eela asau oiddantta kushiyaa ooni
qoodanau danddayii?
Ta haiqoi xillotu haiquwaa mala gido;
ta de7uwaa wurssettaikka etaagaadan hano!” yaagiis.
11 Yaagin Baalaaqi Balaama, “Neeni ta bolli oottiyoobi aibee? Taani nena ta morkketa qangganaadan ehaas; shin neeni eta anjjadasappe attin, haraba ainne oottabaakka!” yaagiis.
12 Yaagin Balaami zaaridi, “Taani GODAI tana haasayissiyoogaappe haraa haasayooyye?” yaagiis.
Balaama Naa77antto Hiraagaa
13 Hegaappe guyyiyan, Baalaaqi a, “Eta neeni be7anau danddayiyo harasaa tanaara hindda. Neeni etappe amaridaagaa be7anaappe attin, eta ubbaa be7akka. Neeni hegan taayyo eta qanggarkkii” yaagiis. 14 Yaagidi Pisgga giyo deriyaa huuphiyan de7iya Xofiima dembbaa ekkidi efiis. Hegan laappun yarshshiyo sohota gimbbiis; gimbbidi issi issi yarshshiyo sohuwan issi korima booraanne issi dorssa orggiyaa yarshshiis.
15 Balaami Baalaaqa, “Taani hinin GODAARA gaittiyo wode, neeni hagan ne xuuggiyo yarshshuwaa matan eqqashsha” yaagiis.
16 GODAI Balaamaara gaittidi kiittiiddi, “Neeni Baalaaqakko simmada, ayyo ha hiraagaa yoota” yaagiis.
17 Yaagin i akko simmidi, ba xuuggiyo yarshshuwaa matan Moo7aaba biittaa halaqatuura eqqidaagaa demmiis. Baalaaqi a, “GODAI yootidobai aibee?” yaagiis.
18 Yaagin Balaami ba hiraagaa hagaadan yaagidi yootiis;
“Xippoora na7aa Baalaaqaa denddada ezgga;
taani yootiyoogaa siya!
19 Xoossai worddotanau asa gidenna;
ba qofaa laammanau i asa na7a gidenna.
I yootidi, ba yootidoogaa oottennee?
Woikko i ba giidobaa polennee?
20 Taani anjjanau azazuwaa ekkaas.
I anjjiichchiis;
taani hegaa laammanau danddayikke.
21 Yaaqooba zariyau iitabi yaanabi,
Israa7eela asau metoi gakkanabi taayyo beettibeenna.
GODAI eta Xoossai etaara de7ees;
i etau kawo gidiyoogaa awaajjoosona.
22 Xoossai eta Gibxxeppe kessiis;
i mino menttaadan etau de7ees.
23 Yaaqooba zariyaa gakkana biti baawa;
Israa7eela asaa qohana murunnoikka baawa.
Asai ha77i, ‘Yaaqoobassinne Israa7eelassi Xoossai oottidobaa be7ite’ yaagana.
24 Ha asai macca gaammeedan denddiis.
Ba oiqqidobaa maana gakkanaashiininne
ba woridoogaa suuttaa uyana gakkanaashin,
shemppenna gaammuwaadan eti eqqi denddoosona” yaagiis.
25 Hegaappe guyyiyan, Baalaaqi Balaama, “Neeni eta mulekka qanggoppanne mulekka anjjoppa” yaagiis.
26 Yaagin Balaami zaaridi, “ ‘GODAI giyoobaa ubbaa oottana’ gaada taani neeyyo yootabeikkinaa?” yaagiis.
Balaama Heezzantto Hiraagaa
27 Hegaappe guyyiyan, Baalaaqi Balaama, “Haa ya; taani nena harasaa efaana. Ooni erii, nena yaa efin Xoossai ufaittidi, nena eta taayyo qanggissanaakko” yaagiis. 28 Baalaaqi Balaama bazzuwaa bollaara duge xeelliyo Pa7oora Deriyaa huuphiyaa efiis.
29 Efin Balaami, “Neeni hagan tau laappun yarshshiyo sohota gimbba; qassi laappun korima booratanne laappun dorssa orggeta taayyo giigissa” yaagiis. 30 Balaami giidoogaadan Baalaaqi oottiis; issi issi yarshshiyo sohuwan issi korima booraanne issi dorssaa orggiyaa yarshshiis.