1 Ta na7au, ta aadhdhida eratettaa ezgga; ne haittaa ta akeekaakko yegga. 2 Yaatikko, adussa qofai neessi de7ana; ne haasayaikka ne eratettaa qonccissana.

3 SHaaramuxa maccaasee inxxarssaappe eessaa ililoi xokkees; i haasayai zaitiyaappekka aadhdhi looxigees. 4 SHin a wurssettan - godare uttaadan cammausu; naa77u baggan qanxxiya mashshadan qara; 5 i tohoti haiquwaakko duge boosona; i hemetai sitti oottidi, duufuwau efees. 6 A de7uwaa ogiyaa qoppukku; i ogeti geella; shin geella gidiyoogaakka a erukku.

7 Ta na7au, ha77ikka taani odiyoogaa siya; taani giyoogaappe kiyoppa. 8 SHaaramuxa maccaasee heeri booppa; i keettaa penggiyaakko shiiqoppa. 9 Hegee xayikko, neeni ne bonchchuwaa haratuyyo aattada immana. Neeni ne yelagatettan meqetti bainna asatu kushiyan haiqqana. 10 Ne aquwaa allaga asati ekkana. Ne daafurada shiishshidobai haraassa gidana. 11 Wurssettan ne ashoinne ne asatettai gilqqin, neeni oolana. 12 Qassi hagaadan yaagana; “Taani timirttiyaa aissi ixxidanaashsha! Ta wozanaikka seeraa aissi karideeshsha! 13 Taani tana tamaarissiyaageeti odidobaa ekkabeikke; tana zoriyaageetu zoriyaakka ezggabeikke. 14 Hegaa gishshau, taani deree shiiqido yaa7an, akeekennan kauyyanau de7ais” yaagana.

15 Neeni ne pulttuwaappe haattaa uya; ne keettaayee xalaalaa siiqa. 16 Ne pulttuwaa dabaaban, ne ollaa haattaakka dembban aissi gussai? 17 Eta neeni ne xalaalau buzotta; hara allaga uraara koxxoppa.

18 Ne pulttoi neeyyo anjjetto; yelagatettan neeni ekkido ne maccaaseera ufaitta. 19 Lo77iya gaareedaaninne ufaissiya genesseedan, i xanttai ubba wodekka nena alo; ubbatoo i siiqoi nena omooddo. 20 Ta na7au, shaaramuxa maccaasiyaa nena aibissi omooddai? Hara asa machchiyo aibissi qoommai?

21 Aissi giikko, asi oottiyoobaa ubbaa GODAI be7ees; i hemettiyo loosso ubbaa xeellees. 22 Nagaranchchaa i oottido nagarai oiqqees. A nagaraa gitee a qachchees. 23 I ba eeyyatettan haliis; ba huuphiyaa naagibeenna gishshau haiqqiis.