1 Kilisi kêgaboac aê su gamoa ŋoc lêtêgeŋ atom me. Ma aê aposolo atom me. Aê galic aêacnêŋ Apômtau Jesu atom me. Aê gajam kôm kêtu Apômtauŋa ma amac atu kôm tau ŋaŋanô atom me. 2 Lau ŋagêdô oc moae sêlic aê katôm aposolo atom, mago katu amacnêm aposolo. Apômtau gêbiŋ amac tôŋ, tec atu ŋoc sakiŋ aposoloŋa ŋabelo.

3 Lau embe sêmêtôc aê go jawaka tauc sa amboac tonec. 4 Aê katôm gebe janiŋ to janôm gêŋ me masi. 5 Aê kêtom gebe janam awê buŋa ma jasêlêŋ jawiŋ eŋ amboac aposolo ŋagêdô to Apômtaunê lasii ma Kêpa sêgôm me masi. 6 Aêagêc Barnaba tauŋgeŋ atôm gebe awi kôm lemeŋŋa siŋ atom me. 7 Siŋwaga ondoc gêjac siŋ ma tau gêjam ôli tau. Asa kêsê wain kôm teŋ ma geŋ ŋanô atom. Ma asa gejob bulimakao ma gênôm ŋasu atom.

8 Aê ŋawa biŋ tonaŋ sa kêpi ŋamalacnêŋ gêŋgeŋ ma biŋsu kêsôm biŋ tau gêwiŋ amboac tonaŋ. 9 Kêsômgac. Teto gêc Mosenê biŋsu gebe “Ôkic bulimakao, taŋ kêka polom ŋanô gêmoa naŋ, awasuŋ auc atom.” Anôtô taê gêjam kêpi bulimakaogeŋ me. 10 Me kêsôm biŋ tonaŋ kêtu aêacŋa. Biŋ tonaŋ teto kêtu aêac tauŋŋa. Ŋac taŋ êkac nom ôkwi to ŋac, taŋ ejoŋ ŋanô sa naŋ, agêc lulugeŋ sêkêŋ mateŋ gebe sêwê kaiŋ kôm ŋanô sêwiŋ. 11 Aêac asê ŋawe ŋalauŋa kêsêp amac. Embe ajoŋ ŋanô nomŋa sa aŋga amacnêm, oc alic amboac gêŋ kaiŋ teŋ me. 12 Lau ŋagêdô embe sêlic êtôm gebe sêwê kaiŋ amacnêm kôm ŋanô, go aêac awê kaiŋ gêŋ alêlêc êsêac su atom me.

Mago aêac akôc gêŋ teŋ aŋga amacnêm atom, aôc gêŋwapac samob, gebe aêacma biŋ teŋ êkô Kilisinê ŋawae ŋajam auc atom. 13 Amac ajalagac gebe lau, taŋ sêjam kôm sêmoa lôm dabuŋ naŋ, têtap nêŋ gêŋ taniŋŋa sa aŋga lôm dabuŋ. Ma êsêac, taŋ sêkêŋ da jagêsac altar naŋ, sêwê kaiŋ da tonaŋ ŋagêdô. 14 Kêtu tonaŋŋa Apômtau kêjatu gebe lau, taŋ sêsôm ŋawae ŋajam lasê naŋ, kôm ŋawae ŋajamŋa tau êlôm êsêac amboac tonaŋ.

15 Mago aê tonec gagôm gêŋ samob tonaŋ ŋai ŋateŋ ŋanô kêsa atomanô. Ma kato biŋ tonaŋ ŋai gebe akêŋ gêŋ êndêŋ aêŋa nec atom. Aê embe jamac êndu êtu moŋa, oc jalic ŋajam êIêlêc ŋac teŋ enseŋ êôc waec kôm tonaŋŋa su. 16 Aê embe jasôm ŋawae ŋajam lasê, oc êŋgôm aê waec êsa atom. Kôm tonec gêjac aê ŋawaegac. Ojae aêma, embe jasôm ŋawae ŋajam lasê atom, oc jamoa naeo. 17 Aê tauc embe jajaliŋ kôm tonaŋ sa, oc jatap kôm tau ŋaôli sa. Mago tauc embe jajaliŋ sa atom, oc êtu ŋoc kôm, taŋ gêjac aê ŋawae naŋ. 18 Amboac tonaŋ aê jatap kôm ŋaôli ondoc sa. Ŋoc ŋaôli tau tonec gebe jasôm ŋawae ŋajam lasê to jakêŋ ŋawae ŋajam tau ŋaômageŋ ma jakac lau gebe sêkêŋ ŋagêjô, taŋ gêjac aê ŋawae kêtu gajam sakiŋ ŋawae ŋajamŋa naŋ atom.

19 Kilisi kêgaboac aê su, tec gamoa ŋoc lêtêgeŋ, mago aê tauc kakêŋ tauc katu samob nêŋ sakiŋwaga, gebe janam lau taêsam ôkwi. 20 Aê katu lau Juda nêŋ ŋac Judaŋa teŋ, gebe janam lau Juda ôkwi. Aê tauc kasô Mosenê biŋsu ŋalabu atom, mago katu lau, taŋ sêsô biŋsu ŋalabu naŋ, nêŋ ŋac kêsô biŋsu ŋalabuŋa teŋ, gebe janam êsêac, taŋ sêsô biŋsu ŋalabu naŋ ôkwi. 21 Aê tauc gamoa Kilisinê biŋsu ŋalêlôm ma yamoa to Anôtônê biŋsumêgeŋ atom, mago katu lau tobiŋsumê nêŋ ŋac tobiŋsumêŋa teŋ, gebe janam lau tobiŋsumê ôkwi. 22 Aê katu lau palê-palê nêŋ Ŋac palê-palêŋa teŋ, gebe janam lau palê-palê ôkwi. Aê katu lau samob nêŋ ŋac gêŋ samobŋa, gebe janam nêŋ ŋagêdô ôkwi-ôkwi. 23 Gêŋ samob tonaŋ ŋai aê gagôm kêtu ŋawae ŋajamŋa, gebe jawê kaiŋ ŋawae ŋajam ŋamoasiŋ jawiŋ.

24 Amac alicgac me, êsêac, taŋ seŋ kwaŋkwaninoc sêmoa naŋ, samob sêlêti, mago ŋac tageŋ oc êtap ŋanô sa. Amboac tonaŋ alêtigeŋ gebe atap ŋanô tau sa. 25 Lau samob, taŋ sebe sêniŋ kwaŋkwaninoc naŋ, têtu mêtê tauŋ gêŋ samobŋa. Êsêac sêgôm gêŋ tonaŋ, gebe têtap sunsuŋ têlageŋŋa teŋ sa. Mago aêac tec dagôm, gebe tatap sunsuŋ teŋgeŋŋa tau sa. 26 Aê tauc kêlêti kalêsageŋ atom. Ma aêagêc ŋac teŋ embe apeŋ tauŋ, oc jatuc lemoc teŋ sawa atom. 27 Aê katu kasec ôlic to kêkôniŋ tauc gebe tauc, taŋ gajam mêtê lau ŋagêdô naŋ, jatu meloc atom.