7
Apômtau kêmêtôc lau jagêdêŋ ŋawê
1 O Apômtau, ŋoc Anôtô, aê gaê lamu aômgeŋ.
Ôjaŋgo aê su aŋga lau samob, taŋ sêjanda aê naŋ nêŋ, ma ônam aê sa.
2 Embe masi, go ŋacjo sêmôniŋ aê êŋgic to sênsaic aê amboac lewe
gebe ŋoc ŋac-ênam-aê-sawaga masi.
3 O Apômtau, ŋoc Anôtô, aê embe jaŋgôm gêŋ keso teŋ
êndêŋ ŋac teŋ,
4 ma embe jatu kasec ŋac, taŋ jagêc amoa tobiŋmalôgeŋ tauŋ naŋ,
ma embe janam êsêac, taŋ sêkêŋ kisa aê ŋaôma naŋ, sa atom,
5 go ŋacjo êjanda aê e naê aê tôŋ ma êka aê tôŋ tamiŋ nom
to êŋgôm aê waec êtu meloc.
6 O Apômtau, ôndi totêmtac ŋandaŋgeŋ ma ôndi sa mêŋonseŋ lau, taŋ sêlêsu aê naŋ, nêŋ ŋaôndu su.
Aôm taŋ kômêtôc biŋ naŋ, matam jali êsa gebe ômoasiŋ aê.
7 Ôkac tenteŋlatu samob sa wactetoc aôm sa acgom,
gocgo wêc ômu ôpi ôwac nêm lôlôc êtiam.
8 Apômtau kêmêtôc lau samob nêŋ biŋ.
O Apômtau, ômêtôc ŋoc biŋ êtôm nêm biŋgêdêŋ ma ômoasiŋ aê êtu ŋoc biŋ masiŋa.
9 Ôkêŋ lau, taŋ sêkac tauŋ su aŋga aômnêm naŋ, nêŋ biŋ alôb-alôb ênac pep,
ma ôpuc ŋac gêdêŋ tôŋ êkô ŋajaŋa.
O Anôtô gêdêŋ,
aôm kôjala ŋoc ŋalêlôm e gôbi lêtêŋ.
10 Anôtô kêkam aêŋoc lautuc ŋagabiŋ.
Eŋ gêjam lau, taŋ taêŋ gêjam biŋgêdêŋ naŋ sa.
11 Anôtô kêmêtôc biŋ jagêdêŋ
ma Anôtô tonaŋ kêkêŋ ŋagêjô kêtôm bêcgeŋ.
12 Ŋac teŋ embe ênam tau ôkwi atom, oc Apômtau êuc nê siŋ ŋamata êsa êtu eŋŋa.
Eŋ êkêkam nê sôb êkanôŋ eŋ.
13 Eŋ êkêŋ nê sôb-enseŋ-lauŋa nadiŋgeŋ eŋ
to ênam jalana tamiŋ nê sôb.
14 Alicgac me, biŋ alôb-alôb gêjam ŋac sec auc. Eŋ taê gêŋ wapacŋa.
Ma embe êkôc, oc talic gêŋ tau gebe biŋdansaŋ.
15 Eŋ kêkwê sê e ŋalêlôm gêjac tau Jaê,
mago tau oc nau tau êsêp nê gêŋ, taŋ kêkwê naŋ.
16 Gêŋwapac taŋ taê gêjam naŋ, oc êŋgôndiŋ eŋ tau,
ma nê gêŋ alôb-alôb oc êtap eŋ tau môkêdaŋgam sa.
17 Aê aoc êôc Apômtau êtu nê biŋ gêdêŋŋa,
ma jaŋga wê êpi Lôlôc Ŋatau Apômtaunê ŋaê.
Dawidnê wê teŋ, gêjam gêdêŋ Apômtau kêtu ŋac Benjaminŋa Kus nê biŋŋa.