PESALEM.
127.
Apômtau embe êkwê andu atom, oc lau tauŋ sênam ŋakoleŋ elêmê. Apômtau embe ejop malac atom, oc keleŋwaga sênam jali êtôm atom. 
Amac embe andi êndêŋ bêbêc kanucgeŋ ma anam kôm e êmbêcauc gebe atap gêŋ êôc amac tôŋŋa sa, oc aŋgôm elêmê. Ŋam gebe Anôtônê lau têtac gêwiŋ êsêacŋa têtap nêŋ gêŋ sa êndêŋ taŋ sênêc bêc naŋ. 
Latuŋi têtu Anôtônê moasiŋ gêdêŋ aêac ma eŋ gêjam mec aêac ŋa gôlôac tau. 
Lau matac latuŋi têtôm sôb, taŋ kêsêp siŋwaga lêma naŋ. 
Aê aoc êôc ŋac, taŋ kêbic nê sôb tolagic-tolagic naŋ. Ŋac tonaŋ embe êmansaŋ nê biŋ êndêŋ nê soŋo-soŋo aŋga malac ŋasacgêdô, oc sêŋgôm eŋ maja êsa atom.