JESAIA.
11.
Ŋasêli teŋ êlêc aŋga ŋakatuc Isai ma ŋawakac teŋ êlêc sa. 
Ma Apômtaunê Ŋalau oc êsêp mêŋênsac eŋ ŋaô. Eŋ Ŋalau kauc mêtêŋa to tajala gêŋŋa. Eŋ Ŋalau êwa biŋ saŋa to Ŋalau ŋaclaiŋa. Eŋ Ŋalau takip biŋ ŋam saŋa to tatêc Apômtauŋa. 
Eŋ oc êtêc Apômtau êtu ênê têtac ŋajam ŋam. Eŋ oc êmêtôc biŋ êpi gêŋ, taŋ mataanô gêlic naŋ atom ma êkêŋ êwiŋ biŋ, taŋ taŋasuŋ gêŋô naŋ, paliŋ-paliŋgeŋ atom. 
Eŋ oc êmêtôc lau ŋasec nêŋ biŋ êndêŋgeŋ ma êmansaŋ lau wapac nêŋ biŋ solopgeŋ. Eŋ oc ênac wauc-wauctêna ŋa sêm awasuŋŋa ma nê awajaô oc enseŋ lau alôb-alôb su. 
Eŋ ênac biŋ gêdêŋ êtu nê obo ênêc dambê palê ma biŋ ŋaŋêŋ êtu nê ômbiŋkap. 
Kêam saleŋŋa to domba ŋalatu oc sêmoa sêwiŋ tauŋ ma pusip saleŋŋa to noniŋ ŋalatu oc sênêc sêwiŋ tauŋ. Bulimakao ŋalatu to lewe oc sêniŋ geŋ sêwiŋ tauŋ ma ŋapalê sauŋ teŋ oc êwê êsêac. 
Bulimakao to iwa oc sê sêlêb êndêŋ tauŋ ma nêŋ ŋalatu oc sênêc napaŋ-napaŋ tauŋ, ma lewe oc êniŋ gêgwaŋ êtôm bulimakao. 
Ŋapalê dedec oc êtu dôa-dôa êŋgôŋ moacwêmnê gêsuŋ ŋaô ma ŋapalê sauŋ oc êkêŋ lêma êsô moacmôsinê ic êna. 
Lau oc sêŋgôm tauŋ sec to sêlênsu tauŋ aŋga aêŋoc lôc dabuŋ atom, gebe lau sêjala Apômtau kêtu tôŋ kêtôm gamêŋgeŋ amboac dembom gêjam gwêc samucgeŋ auc. 
Êndêŋ bêc ônê Isainê ŋawakac oc êtu ŋabelo teŋ êkô ma lau samob sêlic ma tenteŋlatu samob sensom to têtu kênac eŋ ma ênê malac êtu gamêŋ towae.