JESAIA.
42.
“Alic acgom, ŋoc sakiŋwaga, taŋ gajac eŋ sa naŋ, ŋac taŋ kajaliŋ eŋ sa ma katuc galic eŋ ŋajam naŋ, tau tonec. Aê kakêŋ ŋoc Ŋalau jagêsac eŋ ŋaô ma eŋ oc êkôc biŋgêdêŋ êndêŋ tenteŋlatu samob êna. 
Eŋ oc êmôêc êkac sageŋ atom ma êlaiŋ nê biŋ êtu tapa ênêc malacluŋ atom. 
Eŋ oc êpôŋ sôbolec, taŋ tulu kwanaŋgeŋ naŋ, tulu samucgeŋ atom ma êsi daweŋ gasilana êmac atom. Eŋ oc êwaka biŋgêdêŋ sa ŋaŋêŋgeŋ. 
Eŋ oc êtu palê me êtu goloŋ atomanô e ênac dabiŋ biŋgêdêŋ aŋga nom, ma nuc sêkêŋ mateŋ ênê biŋsu.” 
Apômtau Anôtô, taŋ kêkêŋ undambê ma kêlaiŋ gêŋ tau ma kêmasaŋ nom to ŋagêŋlêlôm samob ma kêkêŋ lau nomŋa sêsê aweŋ to kêkêŋ mateŋ jali gêdêŋ gêŋ samob, taŋ sêsêlêŋ sêmoa nom ŋaô naŋ, kêsôm biŋ tonec gebe 
“Aê Apômtau, aê kakalem aôm tobiŋgêdêŋgeŋ ma kakam aôm tôŋ gêdêŋ lêmam ma gajam jaom aôm. Aê kakêŋ aôm kôtu ŋoc poac ŋabelo gêdêŋ lau, ma kôtu tenteŋlatunêŋ ja. 
Gebe ôŋgôm lau mateŋpec nêŋ mateŋanô êpoa lasê to ôwê lau kapoacwalôŋa sêsa aŋga gêsuŋ sêmêŋ ma êsêac, taŋ sêŋgôŋ tokesecgeŋ naŋ, sêsa aŋga kapoacwalô sêmêŋ. 
Aê Apomtau, aêŋoc ŋaê tau tonaŋ. Aê jawi ŋoc ŋawasi siŋ êndêŋ lau teŋ atom ma jawi ŋoc waec siŋ naelom gwam atom. 
Alic acgom, biŋ laŋgwa ŋanô kêsa sugac ma galoc oc jasôm biŋ wakuc lasê. Biŋ tau ŋanô kêsa atom tageŋ ma jasôm lasê êndêŋ amac kwanaŋgeŋ.” 
Aŋga wê wakuc teŋ êndêŋ Apômtau ma alanem eŋ e êndêŋ nom ŋamadiŋ. Gwêc to ŋagêŋlêlôm ŋadindiŋ êsa ma nuc to lau, taŋ sêŋgôŋ tonaŋ naŋ, sêlambiŋ sêwiŋ. 
Gamêŋ sawa tau to malac gamêŋ sawaŋa sêôc aweŋ sa ma lau Kedar nêŋ malac amboac tonaŋ. Lau taŋ sêŋgôŋ gamêŋ Sela naŋ, sênam lasê ma nêŋ ŋaôndu êpi aŋga lôc ŋatêpôê. 
Êsêac tetoc Apômtau sa ma sêsôm ênê wae lasê aŋga nuc. 
Apômtau oc êsa amboac ŋactêkwa teŋ, eŋ êli tau sa amboac ŋac siŋŋa teŋ. Eŋ ênam wambaŋ to ênac mu. Eŋ êtôc tau êndêŋ nê ŋacjo gebe eŋ ŋac siŋsêlêc. 
“Aê gaŋgôŋ gamêŋ gêmac ŋasawa ŋêŋgeŋ, aê kasôm biŋ atom ma gajam tauc tôŋ. Ma galoc aê oc jataŋ lasê amboac awênê gabêsi sec. Aê oc jasê aoc e tekoc êmbac-êmbac. 
Aê oc jaŋgôm lôc to gamêŋ ŋabau êtu gasaŋ ma ŋagêgwaŋ samob êsêlic. Bu kapôêŋ oc ŋamaŋ ŋaôma ma bugêjactoŋ ŋakeleŋ êsa. 
“Aê oc jawê lau mateŋpec sêsa intênasêga, taŋ sêjam kauc naŋ, ma sêsa intêna sauŋ, taŋ sêjala atom naŋ. Aê janam ŋakesec, taŋ gê êsêac auc naŋ, ôkwi êtu ŋawê ma gamêŋ kaloŋ-kaloŋ ŋatip êsa. Gêŋ samob tonaŋ ŋai aê oc jaŋgôm ma jandec sênêcŋa atom. 
Êsêac taŋ sêkêŋ gêwiŋ anôtôi jaba ma sêsôm gêdêŋ gwam gebe ‘Aêacma anôtôi amac’ naŋ, oc sênu tauŋ su tomajeŋgeŋ sêna.” 
“Amac lau taŋemsuŋbic aŋô biŋ, ma amac lau matempec alic to asala gêŋ. 
Asa matapec kêtôm ŋoc sakiŋwaga ma asa taŋasuŋbic kêtôm ŋoc jaeŋwaga, taŋ kasakiŋ eŋ naŋ. Asa matapec kêtôm eŋ, taŋ ôli andaŋ aê naŋ, ma taŋasuŋbic kêtôm Apômtaunê sakiŋwaga. 
Aôm gôlic gêŋ taêsam, mago kôsala atom. Aôm taŋamsuŋ kêpoa lasê, mago gôŋô biŋ atom.” 
Kêtu nê biŋgêdêŋŋa Apômtau gêlic ŋajam, gebe êŋgôm nê biŋsu êtu kapôêŋ to ŋawasi êsa. 
Mago kêjaŋgowaga sêjam geŋgeŋ ma sêjaŋgo lau tonec nêŋ gêŋ samob su. Êsêac samob têtôm bôc kêsêp sê ma sêsiŋ tauŋ sêŋgôŋ kapoacwalô. Êsêac têtu ŋacjonêŋ gêŋ sugac ma ŋac teŋ gêmoa gebe ênam êsêac kêsiŋa atom. Ŋacjo sêjaŋgo êsêac su ma ŋac teŋ kêsôm gebe “Akêŋ êsêac sêmu sêna,” nec atom. 
Amacnêm asa êkêŋ taŋa biŋ tonaŋ. Asa oc êŋô ma taê ênam êtu têm, taŋ oc mêŋêsa naŋŋa. 
Asa kêkêŋ Jakob gêdêŋ lau saic-saic ma Israel gêdêŋ kêjaŋgowaga. Apômtau taŋ aêac dagôm sec gêdêŋ eŋ naŋ, gêgôm atom me. Êsêac sêsa ênê lêŋ mansaŋ atom ma taŋeŋ wamu ênê biŋsu atom. 
Tec eŋ kêsêwa ŋandaŋ têtac ŋandaŋŋa to siŋ ŋajaŋa kêpi eŋ. Eŋ kêkêŋ jawaô kêkôm eŋ auc, mago nê kauc kêsa atom. Gêŋ tau geŋ eŋ ôli, mago kepeŋ ênê ŋalêlôm atom.