Joel.
1.
Apômtaunê biŋ gêdêŋ Petuel latu Joel tau tonec. 
Amac lau ŋanôac, aŋô biŋ to amac lau gamêŋ tonecŋa, akêŋ taŋem. Amac alic gêŋsêga amboac tec teŋ ŋanô kêsa gêdêŋ amacnêm têm me gêdêŋ abeminêŋ têm me masi. 
Anac ŋamiŋ êndêŋ nêm gôlôac wakuc sêŋô. Êsêac sênac ŋamiŋ êndêŋ nêŋ wakuc ma elom-elom amboac tonaŋgeŋ êna. 
Gêŋ taŋ wagô-kêlêŋa dedec gêcŋa naŋ, wagô-sêboaŋŋa mêŋseŋ. Ma gêŋ taŋ wagô-sêboaŋŋa dedec gêcŋa naŋ, wagô-sêlôpŋa mêŋseŋ. Go gêŋ taŋ wagô-sêlôpŋa dedec gêcŋa naŋ, wagô-ŋatêna-kêsaŋa mêŋseŋ. 
Amac anôm-gêŋ-anaboawaga, matem êlac ma ataŋ lasêmaŋ. Amac anôm-wainwaga samob, apuc taŋiboa sa êtu wain ŋakanaŋa, taŋ sêkac su aŋga awemsuŋ naŋ. 
Gebe lau-m teŋ sêwê sêpi mêŋsêjam aêŋoc gamêŋ auc, lau ŋactêkwa ma taêsam ŋanô lasê. Luŋluŋ kêtôm lewe kapoac nê ma ŋani amboac lewe têna nê. 
Êsêac seseŋ aêŋoc wain ŋamôkê su ma sêsap ŋoc jambô tulu. Êsêac selec ŋaôlic su sêbaliŋ siŋ jagêc nom e ŋalaka ŋapom ŋaôma. 
Ataŋ taŋiboa amboac awêtakiŋ, taŋ gêjam abec kêtu nê ŋac, taŋ sê gêdêŋ eŋ naŋŋa. 
Êsêac sêkêŋ gêŋ taniŋŋa to gêŋ tanômŋa kêtu da aŋga Apômtaunê andu kêtiam atom. Apômtaunê sakiŋwaga, dabuŋwaga tauŋ, sêpuc taŋiboa sa. 
Kôm tau kêtu gasaŋ nom tau kêtaŋ gebe sêjaiŋ kôm ŋanô gêjaŋa, wain ŋanô kêmêliŋ ma niptêkwi kêpa. 
O kômwagaac, nêm ŋalêlôm êôc auc ma kômwaga wainŋaac, ataŋmaŋ. Kêtu jaŋgom to polomŋa gebe kôm ŋanô kêtu sec su. 
Wain ŋamôkê kêmêliŋ ma jambô kêsêlic. Aiŋ to nip ma uc to gêŋkaiŋ samob kêtu masê aŋga sêŋam. Ma têntac ŋajam gêc su aŋga ŋamalacnêŋ. 
O dabuŋwagaac, asô talu sa ma ataŋ. O sakiŋwaga altarŋa, anam taŋiboa sa. Ŋoc Anôtônê sakiŋwagaac, amêŋ tonêm abecgeŋ gebe sêgamiŋ gêŋ taniŋŋa to gêŋ tanômŋa ma sêkêŋ kêtu da aŋga nêm Anôtônê andu kêtiam atom. 
Akêŋ noc anam dabuŋŋa teŋ. Akalem gôlôac sêpi tageŋ. Akac kasêga to gamêŋ ŋatau samob sa sêpi tageŋ dêndêŋ Apômtau, amacnêm Anôtô, nê andu, go awam ênac Apômtau. 
Ojae, bêcsêga taugoc. Apômtaunê bêc kêdabiŋ ma mêŋgêô lasê amboac gêŋ ŋaclai mêŋkêpoa lasê aŋga Ŋajaŋa Ŋatau nê. 
Sêkac gêŋ taniŋŋa su gêdêŋ aêac mateŋanô atom me. Ma têntac ŋajam to ôliŋ kêpi gêwi aêacnêŋ Anôtô nê andu siŋ atom me. 
Gêŋ ŋawê kêtu matê aŋga nom ŋalêlôm lêsucm kêpô lêtêŋ ma andu gêŋ ŋanôŋa kêku gebe kôm ŋanô masi. 
Bôc têtaŋ gêŋ ma bulimakao ŋatoŋ sêmoa jageo ma têtap gêgwaŋ sa atom ma domba totoŋ-totoŋ sêpô lêna tauŋ. 
O Apômtau, aê aoc gêjac aôm, gebe ja geŋ gêgwaŋ ŋamêdôb aŋga oba ma jawaô kêsêgô gêŋkaiŋ samob aŋga sêŋam. 
Bôc saleŋŋa aweŋ ec-ecgeŋ têtaŋ gêdêŋ aôm gebe bu kêpa ma ja geŋ gêgwaŋ ŋamêdôb aŋga oba.