10
1 Ju̱denu jteda ji̱ta jiryatiy Muyisésibemyusirya, vinu samiy vichasa̱da jnutu day jiryatiy jativyenumara. Ne ravichanu̱yada si̱tenu vichasa̱da jiryatiy sabachara vurya̱jiju̱ra. Dañuma riñi jnutatyajaya̱ caserdótevyeda nijya̱nvajyuu jiyadaju̱ni̱ jasi̱ jvachi̱, Ju̱denunijyu̱, tama̱ vana̱y jto̱tanivye rivyichasara samivye, tama̱, rityi rañi tuudiya̱sara ratani̱ Ju̱denu. 2 Raryityi jto̱tadeda ru̱ntatya̱dara rivyichasa̱da samivyejyu̱, riryi paru̱yada riva jasi̱ jvachi̱ jnutatya̱da variy, jiryatiy riryi ma̱cho̱ variy pu̱chavay, ne riryi jachipiya̱ jiyasachavay variñu̱dayu. 3-4 Jivye jasi̱ ji̱ta jiryatiy Ju̱denunijyu̱ jvachavaryi, rañi jachipityataniy nu̱ñi tanijya̱quimusiryi nijya̱nvay rijyuuchuvedanchiy, jiryatimyu̱ ne vana̱y rapu̱y voca nudaja̱ra vu̱jyuuchuveda vuryivasiy, dantyamu̱y ne carni̱ru nudaja̱.
5-7 Ramuni̱tiy siti̱jadanumatiy Crístu jirya mucadimu, su̱teda siva jijye̱ variy:
“Jivya̱tasaratyara jasi̱ jvachi̱ jnutatyasa̱da yiva. Yindejadara nijya̱mi̱vu̱ ra̱jiju̱ ramusityi ra̱siityee jiijyu̱. Samiy jvadicharavitya jidyiya daryaju̱ra jiryatiy ru̱ntatyasara nijya̱nvay jiñijyu̱ni̱ jasi̱ jvachi̱, jiryatiy riryupeda yichana̱tya̱damu jiñijyu̱ni̱, varimyata rijyuuchuveda murichiryaju̱. Ri̱tachara variy yiva: Ya̱jnu̱y Ye̱ye̱, riti̱ma̱ ra̱tidye jvaarya jivya̱tara, darya nu̱charatiy catera padyevya raynchirya.”
8 Su̱teda Crístu munatya:
“Jivya̱tasaratyara jasi̱ jvachi̱ jnutatyasa̱da yiva, daryantyamu̱y ne jiryatiy ru̱ntatyasara nijya̱nvay jiñijyu̱ni̱ jasi̱ jvachi̱, jiryatiy riryupeda yichana̱tya̱damu jiñijyu̱ni̱, varimyata rijyuuchuveda murichiryaju̱,”
dañuma riñi jnutatyasara Ju̱denu jtedamuju̱ra. 9 Rivasiy ji̱ta su̱teda Crístuntiy:
“Ya̱jnu̱y Ye̱ye̱, riti̱ma̱ ra̱tidye jvaarya jivya̱tara.”
Jirya saniquejadata jipyaruta̱dara munatya Ju̱denu jteda jasi̱ jvachi̱nchiy, sa̱tidye jnutatya ru̱bivaju̱yu. 10 Variñi̱ ji̱ta Ju̱denu va̱ta̱damu vu̱vyichasara jiintyasavay saju̱, Jesucrístu batyedata, jiryatiy su̱ntatyama̱ Ju̱denunijyu̱ra jivyu̱.
11 Ju̱denu jtedamusiy riryaniñu̱yada caserdótevyeda sanijyu̱ jvaavye, jiryatiy ru̱ntatyajaya̱sara japichiy Ju̱denunijyu̱ riy jasi̱veda jvachavay jiryatimyu̱ ne vana̱y raso̱vacheda ruuvasirya jijyuuchuveda. 12 Jesús ji̱ta, su̱ntatya̱danumatiy Ju̱denunijyu̱ra jivyu̱, ti̱ta̱ju̱ vu̱jyuuchuveda murichirya, sama̱sa̱da variy Ju̱denu nutyityudamyuju̱. 13 Jadchiy ji̱ta santuy ra̱jiju̱ jiryatiy sa̱bay Ju̱denu sanumutujare riy jimyityasimyi. 14 Taraqui su̱ntatya̱data daryaju̱ yito̱tanimyu̱rya vu̱jiintyasa̱da Ju̱denuju̱.
15 Satu̱chusara vijyo̱mujache Ju̱denu Jnutu vuryivantiy jiryatiy su̱teda:
16 “Jiryatirya rañiquejada jiryatiy ra̱jtay rivasiy rusa̱ju̱ra. Ra̱numa barya rañiquejada rijechimyu, ra̱nu̱y variy rijechipiya̱jadamura.”
17 Su̱teda jadchintyi:
“Ne ra̱jachipityasarara rijyuuchuveda nu̱day, mitya, dantyamu̱y ne ruvaayada jiryatiy rañiquejada jiyaro̱ju̱ra.”
18 Jiryatiy saramityanimya̱ Ju̱denu vuryivara vu̱jyuuchuveda, vuryivaayada jarye, jiryatiy saniquejada jiyaro̱ju̱ra, ne vu̱vya̱ta Ju̱denunijyu̱ nu̱ndyerya vu̱jyuuchuveda murichirya jnutatya̱da nu̱day, mitya.
Vu̱ryi tuudiye̱ñi̱ Ju̱denu
19 Ramuni̱tiy, ratyeryi̱veda, vurya̱numa jay vu̱chuvu̱yasa̱damu Ju̱denu jiintyasájomuju̱, jiryatiy sarubeda Jesúsra yindaja̱ vuryeyadaju̱. 20 Samuttasara daryaju̱ vu̱jyu̱ra vadi jajyo jiryatiy jnu̱rya darya, tapi ni̱ni̱ sani̱cha vu̱jejyo, jiryatiy setasara daryaju̱ra savu̱ nu̱tyu mutanujay, jiryatiy Ju̱denu mo̱ jiyada vicharára, vurya̱tidye ju̱ti̱ simuju̱. 21-22 Jiryatiy ni̱ni̱ sani̱cha nijya̱nvay jiyada rá̱ñu, jiryatiy sansu̱chara jaryiñu̱ nta Ju̱denu rorimyu, vurya̱numa tuudiye̱ samirya jachityavañi̱ Ju̱denu. Vurya̱numa jachipiya̱ vu̱chuvu̱yasa̱damu sanijyu̱, jiryatiy pu̱charanuma jiyasayadajisiy ti̱ta̱ju̱ra vu̱jechipiya̱jada, nu̱tyu vu̱vyu̱ jarye suutasara nta vandaja̱ta, vuryi̱tyu̱yadata. 23 Vurya̱numa ju̱riy surravarya vu̱tyu̱choda Ju̱denu jiyadaju̱, jiryatiy vu̱yntuchara sa̱jiju̱, ne siquityaja̱ra vu̱jechipiya̱jada sanchiy, ni̱ni̱ ji̱ta ra̱jto̱tanichara daryaju̱ra yiteda vuryeyadaju̱ day. 24 Vurya̱numa jachipiya̱ vu̱ñijyu̱: nu̱tyuramusiy vu̱ryi jo̱ta va̱ta̱da vu̱y, nu̱tyuramusiy, samiy jvaayada jarye risa̱ju̱. 25 Ne vu̱ryi paru̱y riva vu̱yntye̱ryadeda vu̱y, nu̱tyu tavatyi paru̱chara riva. Vurya̱numa vanu̱tya jaryivya̱ju̱ nu̱ñi ti̱quimusivyu̱y, jiryatiy vu̱dyi riva tamitya runda tuudiye̱yada.
26 Vuryi̱mutya̱jadanumatirya datya̱da si̱tenu Ju̱denu niquejadanchiy, vu̱ryityi jiriryi̱ra juuchuveda vu̱dyetya̱damu variy, ne tara ju̱na̱y tara jadchiñu̱day ta̱ramusitya sa̱ramityaniy Ju̱denura vu̱jyuuchuveda ju̱na̱y jadchiñu̱dantyi. 27 Vurya̱day nutuy ji̱ta vu̱chuvu̱yadanube variy ra̱jiju̱ Ju̱denu murichenutadeda, jiryatiy sa̱ca̱siryu̱y jijiidatya riy jimyityasimyi. 28 Nijya̱mi̱ ji̱ta, ni̱tiy raryi rrachodara Ju̱denu niquejada jiryatiy Muyisésibemyusirya, ni̱ni̱ diiyada jantyutyasi̱sá̱ ru̱co̱siy nanutu̱chuta̱danumatiy danu̱ju̱y nijya̱mi̱ju̱ñi̱, varimyata mu̱nvamyusiy. 29 Ta̱ jaryivya̱ju̱ murichenutadeda saryi jmutya̱ dyetya nijya̱mi̱ ni̱tiy raniye̱ nta mucadinubeju̱ni̱ Ju̱denu denu, sa̱viryu̱tya varirya Crístu nudaja̱ ratatiy sani̱cha̱da jiintyasi̱ Ju̱denuju̱. Sa̱vityiye̱ daryamusiñi̱ Ju̱denu Jnutu jiryatiy sani jmu̱tyaru̱ñi̱. 30 Vu̱dyetya ji̱ta daryaju̱ni̱ Ju̱denu jiryatiy su̱teda:
“Rajyu̱numa ra̱cha murichenutadeda jto̱tadeda day, rañuma ra̱murichenutanicharara.”
Jadchintyi su̱tedantiy:
“Sa̱saranusara Vu̱yntyityu̱ra jiñijya̱nvay murichenutanicha̱da.”
31 Suvu̱chara ji̱ta ju̱u̱yada ju̱na̱reju̱ vichi̱ Ju̱denu jomu.
32 Jirya̱ma̱ jachipityara jivyicha̱da rano̱no̱nu̱ñumatiy Ju̱denu datyadoda jirye, jiryatiy jiryejechi̱nitya̱da jantyuramusirya totiyadasumarya. 33-34 Jiryevyichanu̱yada vijyo̱mujache javittyuchavay, jiyasantasavay jarye risa̱ju̱, jadchintyi jiryepyaru̱tyajaya̱ rusa̱ darya vichanichavayu, jiryatiy jirye̱ntyutya̱da riy tanuvu̱nusavay, jiryedyiryejada yichana̱yadamura jiryeberya paranusa̱da, jiryedyetya̱da daryaju̱ jivyichasara taratavay, jiryatiy samiryava̱ju̱ darya, suru̱yada jachara jarye risa̱ju̱ra. 35 Ramuni̱tiy ne jirya̱jatya yajisirya jichuvu̱yasa̱da, jiryatiy ja̱mura murichevarya daryaju̱ darya. 36 Jiryevya̱ta daryaju̱ra tapimusiy jachi̱deda, jirya̱numatiy jvaarya Ju̱denu va̱ta̱da, jirya̱jmutya̱ varirya jiryatiy su̱teda ya̱sa̱y jiryerya. 37 Tapi vani̱ra jaryuve sa̱day jniy ni̱tiy ra̱jniy, ne sa̱riche. 38 Jiryatiy rimu tuva̱chu̱ni̱, ri̱tachara variy sami̱ ni̱, sa̱jnu̱jeya̱sara ju̱na̱re variy. Saryityi dutyaru̱y jichuvu̱yadamuyu, ne samiy jvadichi̱ saryicha variy rajyu̱. 39 Vu̱y ji̱tamu̱y ne siityejada vu̱ryudivaju̱ vu̱pyarutasa̱damuju̱, vu̱tyuva̱choda ji̱ta vu̱beyanu ramityadedaju̱.