1 Meˈ bagayku kinalasahankun, daˈa magtawus kahagadun bi bang niyaˈ meˈ aˈa magpaˈin weˈ laˈi si siye Niyawa Tuhanin. Subey dahuˈ pandogahanbi meˈ panoloˈden supaya kataˈuhanbi bang bennal laˈi si siye Niyawa Tuhanin atawa gaˈ. Peggeˈ ekka ne meˈ aˈa paguwaˈ si meˈ kalahat-lahatan tuˈu si dunya magmā-mā nabi siye. 2 Kuweˈ inin pangilalehanbi meˈ aˈa palaˈihan Niyawa Tuhanin: sasuku magpaˈin weˈ Isa Almasi bakas pitu si dunya magbaran manusiyaˈ, aˈa miyaˈan palaˈihan Niyawa Tuhanin. 3 Saguwaˈ sasuku magpaˈin weˈ gaˈ Almasihin bakas pitu magbaran manusiyaˈ, gaˈ laˈi si aˈa miyaˈan Niyawa Tuhanin. Saguwaˈ takite si iye weˈ tuhutne pikilan Kuntara Almasihin. Bakas taˈaka ne hep si kaˈam weˈ pitu du Kuntara Almasi inin duk kuweˈitu ekka ne meˈ aˈa si dunyahin nuhut pikilan Kuntara Almasihin.

4 Saguwaˈ, meˈ anak-ampuku, kaˈam iyan sukuˈ si Tuhanin hep. Daˈag weˈ bi meˈ aˈa magmā-mā nabi siye sabab gaˈi du kaˈam taboˈode nuhut meˈ toloˈden. Daˈag siye weˈ bi peggeˈ Niyawa Tuhan dem ateybin balakatan amban niyawa malaˈi si meˈ aˈa manggaˈi manuhut Tuhanin. 5 Meˈ aˈa magmā-mā nabi inin sukuˈ si dunya hep hadja hangkan panoloˈden sabab meˈ bayuˈ-bayuˈan si dunya. Duk pinakale siye weˈ meˈ aˈa sukuˈ si dunyahin, meˈ manggaˈi manuhut Tuhanin. 6 Saguwaˈ kite bi inin sukuˈ si Tuhan. Sasuku mangataˈuhan Tuhanin pakale si kite bi. Sasuku dumaˈin sukuˈ si Tuhanin gaˈi pakale si kite bi. Kuweˈ inin pangataˈuten bang toloˈin amban Niyawa Tuhanin atawa gaˈi.

7 Meˈ bagayku kinalasahankun, subey kite bi maglasa-ilasa peggeˈ lasahin amban Tuhan. Sasuku asal mamalasahin, anak Tuhanin iye duk kataˈuhanne Tuhanin. 8 Manggaˈi mamalasahin gaˈi kataˈuhanne Tuhanin peggeˈ Tuhanin malasa hep teˈed. 9 Kuweˈ inin pamakite Tuhan lasane si kitehin: pinapitu weˈ ne si dunya Anakne dambuwaˈ-buwaˈin supaya kite bi taga umul gaˈ tamanan si surgaˈ sabab Anaknen. 10 Lasa mabennalin dumaˈin lasate si Tuhanin, saguwaˈ lasa Tuhan si kitehin. Duk hawal lasane si kitehin pinapitu weˈ ne Anaknen si dunya supaya taˈampun duseten bi sabab iye.

11 Meˈ bagayku kinalasahankun, bang kuweˈ inin hadje lasa Tuhan si kitehin bi, na, kite bi isab subey maglasa-ilasa. 12 Gaˈ niyaˈ aˈa bakas ngite Tuhanin. Saguwaˈ bang kite bi maglasa-ilasa, tuˈu Tuhanin dem ateyte bi. Magkasōng isab lasate bi si Tuhanin duk ujud jukup bang kite bi tattap maglasa-ilasa.

13 Kabugtuˈante bi weˈ magdambuwaˈ kite bi duk Tuhanin duk teteg isab Tuhanin si kite bi peggeˈ pinangurung weˈ Tuhanin Niyawanen si kite bi. 14 Duk bakas takite kami duk naksiˈ isab kami weˈ bakas pinapitu weˈ Tuhanin Anaknen si dunya nimbul meˈ manusiyaˈin kēmon. 15 Sasuku magbennal si meˈ aˈa weˈ si Isa Anak Tuhanin, teteg iye si Tuhan duk teteg Tuhanin si iye. 16 Kataˈuhante bi ne duk ngandel kite bi weˈ kalasahan Tuhanin kite bi.

Tuhanin malasa teˈed, duk sasuku matuyuˈ malasa si Tuhanin duk si pagkasine, teteg iye si Tuhan duk teteg isab Tuhanin si iye. 17 Pinajukup lasate bi si Tuhanin, supaya kite bi gaˈi tinalew si ellew pangahukumne meˈ manusiyaˈin kēmon, peggeˈ kataˈuhante bi weˈ addatte bi tuˈu si dunyahin kuweˈ du addat si Isahin. 18 Lasa mabennalin gaˈi sagetan talew peggeˈ bang asal bennal kite malasa si Tuhan, lanyap talewten. Sasuku tinalew gaˈi pe jukup lasanen peggeˈ talew iye kaw iye ilegga weˈ Tuhanin.

19 Malasa kite bi peggeˈ Tuhanin dehellu mamalasa si kitehin bi. 20 Bang niyaˈ magpaˈin weˈ malasa iye si Tuhan bu kabunsihanne du pagkasinen, magdustaˈ iye. Peggeˈ bang gaˈi iye malasa si pagkasine takitenen, inumey pangalasane Tuhan manggaˈi takitenen? 21 Iye inin daˈakan pinangurung Almasi si kitehin bi weˈ sasuku mamalasa si Tuhanin, subey isab malasa si pagkasinen.