1 Asal pastiˈ pinaˈin Niyawa Tuhanin weˈ si pasōngan niyaˈ meˈ aˈa nayikutan toloˈ mabennalin. Iye pinakalede iyan meˈ seyitanin duk tuhutde iyan meˈ toloˈden. 2 Meˈ toloˈde inin pinalataˈ weˈ meˈ guru madustaˈanin. Meˈ hinangande inin gaˈi ne makasasew pikilanden peggeˈ tagam ne siye magdustaˈ. 3 Meˈ guru inin magtoloˈ weˈ dusehan koˈ aˈahin bang magella atawa maganda. Paˈinde isab weˈ niyaˈ koˈ meˈ kinakan gaˈi makajari kakante. Salaˈ toloˈde inin peggeˈ kēmon kinakan inin pinapanjari du weˈ Tuhanin. Basta magsukul kite bi si Tuhan makajari kite bi mangan kinakan ine-ine, kite bi meˈ masandel pu si Isa Almasihin duk mangataˈuhan toloˈ mabennalin. 4 Peggeˈ kēmon bakas pinapanjari weˈ Tuhanin hāp. Hangkan subey tayimaˈte hadja basta magsukul kite si iye. 5 Peggeˈ halal kēmon kinakanten sabab lapal Tuhanin duk sabab pagsukulten isab.

6 Manjari, Timoteo, bang pangusihatnu meˈ pinaˈinku inin si meˈ pungtinaˈite masandel pu si Isa Almasihin, hāp paghinangnu pu si Isa Almasihin. Duk basag sandelnun peggeˈ lapal kinahagadten asal tuhutnu ne paˈin. Asal teteg kew nuhut toloˈ mabennalin. 7 Saguwaˈ daˈa asipun meˈ kissa-kissa paˈinde makaboˈo aˈahin tudju Tuhan bu gaˈi du. Meˈ kissa miyaˈan gaˈ teˈed niyaˈ kagunahanne. Saguwaˈ tagamun pikilannun luwal mikil toloˈ mabennalin duk du tatuhutnu meˈ kinabayaˈan Tuhanin. 8 Bang pabasagte baranten, niyaˈ kagunahanne saguwaˈ kulang du. Saguwaˈ bang iye pinabasagten sandelte si Tuhanin supaya tatuhutte kinabayaˈan Tuhanin, na, ekka teˈed kagunahanne. Moˈo kite inin si kahāpan dumaˈin hadja tuˈu si dunya saguwaˈ sampay si ahilat. 9 Bennal teˈed bissā miyaˈan duk pataˈ teˈed kinahagad. 10 Hangkan kite bi maghinang ne paˈin si Tuhan duk magtuyuˈ teˈed magusihat peggeˈ Tuhanin pangase-ngasehanten bi; iye Tuhan maˈellumin duk iye manimbul kēmon manusiyaˈin, lagiˈ ne meˈ masandel si iyehin.

11 Manjari, Timoteo, kēmon meˈ usihatku inin daˈakun tinuhut si meˈ masandel pu si Isa maluˈuhin. 12 Daˈa kew iyaˈ bang niyaˈ ngandiyawaˈan kaˈu peggeˈ magusihat ne kew bu bataˈ pe kew. Saguwaˈ subey hāp kawul-piˈilnun duk bissānun. Kalasahanun pagkasinun, pabasagun sandelnu si Tuhanin duk subey gaˈ niyaˈ laˈat dem pikilannun. Manjari binatukan du kawul-piˈilnun weˈ meˈ masandel pu si Isa Almasi maluˈuhin. 13 Samantaˈan gaˈi pe ku tapiyu, tuyuˈanun teˈed matsa amban dem kitab duk usihatanun duk toloˈanun siye kahabaˈ kaˈam magtipun duk meˈ pagkasibi masandel pu si Isa Almasihin. 14 Gunahun teˈed kapandeyan pinangurung Niyawa Tuhan si kaˈuhin. Pinangurung kapandeyan inin si kaˈu matuˈuhin sakaliˈ niyaˈ pinaˈal bissā amban Tuhan sabab kaˈu duk binettad weˈ meˈ bahiˈin meˈ tanganden pī si kaˈu. 15 Hinangun teˈed kēmon pinahinangku si kaˈu si sulat inin ateynun dambūs-būs supaya takite aˈahin kēmon weˈ pasōng ngahāp hinangannun. 16 Pahatul-hatul kew si dinu duk meˈ panoloˈnun. Duk hinangun paˈin meˈ usihatku si kaˈuhin. Bang pagtuyuˈannu inin hininang, dumaˈin hadja kaˈu matimbulin saguwaˈ kēmon isab makakale kaˈuhin.