Yunus.
2.
Pag laˈi iye diyalem kennahin ngampun-ngampun si Yunus tudju Tuhan. 
Paˈinne, “Pag laˈi ku dem kasusehan lingananku Tuhanin, ubus bu sambunganne ku. Pag laˈi ku diyalem lahat meˈ pateyin māku tabang ku bu pakale kew si paglingankun. 
Lakasannu ku pī dem kalaleman dem tengngaˈ sellang duk sellegin paliput si aku; kadebbunan ku weˈ kēmon goyaknun duk meˈ goyak mahadjehin. 
Kannalku, ‘Pinatahalaˈ ku amban matanu; gaˈi ne kiteku balik langgalnu masutsihin.’ 
Sōng lambo ku weˈ tahik mapaliput si akuhin tahik malalemin paliput si aku. Meˈ sabet dem tahikin palibed si kōkku. 
Palenneb ku pī si poˈon punuhin. Pakissup bulakin pag dumiyalem ku supaya ku gaˈi lumuwas salama-lama. Saguwaˈ kaˈu, Tuhan, Panuhutankun, boˈonu du ku balik amban dem kalaleman, ellum pe. 
Pag sōng ubus ne umulkun taˈessebte kew, Tuhan; ngampun-ngampun ku si kaˈu duk tapī pangampunkun si kaˈu diyalem langgalnu masutsihin. 
Sine-sine nuhut meˈ tuhan-tuhande manggaˈ niyaˈ balinen lebbahande ne sandelde si kaˈuhin, Tuhan. 
Saguwaˈ aku, magpasalamat ku duk magkurban ku si kaˈu. Meˈ bakas tunggaˈku si kaˈuhin tumananku du. Tuhanin hadja manimbulin.” 
Ubus inin dinaˈak weˈ Tuhanin si Yunus pinaluwas si kennahin pī si higad tahik.