1 Tële tlibutu wamutuju na eso ho Fero nimitelë hwi tle. Bu nimitelë mehwi latle. Bu Nail tu helefo mëta tlibe. 2 Na 7 bulmakau kleli tatako, tu mago fe motokoke, lifijuwa. Na bu tu helefo mago agosaba hi mele. 3 Na tokwafe 7 ato tikatabo bulmakau kleli mata tu mago fe motokoke. Na bu tatako bulmakau kleli mëglëbo li mëta mëtlibe. 4 Na tokwafe ato tikatabo bulmakau kleli tatako bulmakau klelibëme hi mëtle. Eso ho Fero bu kë nimitelë hwi tle na ni mago lahujuwa tëkake. 5 Na ita ni tëtebokwake na li nimitelë hwi tle. Witi hi wesibi jowa hulu lële na kë jowa witi mëta hi wesibi 7 këniji mëbe. Na bu tatako mële na lalemu mëbe. 6 Na tokwafe li witi hi wesibi jowa hulu lële na kë jowa witi mëta hi wesibi 7 këniji mëbe. Kwe bu tokwëtokwë mëbe na tëbo lamele. Na ona elë mago atëte tabo flelu ligisibë na lakokowa mëbe. 7 Kwe kë tokwëtokwë witibë tatako witime lahiwa mele. Na eso ho Fero huju tëkake na lowene tle, “Bo nimitelëna hwi nelëfe.” 8 Na olobalë bu tako tutune latle. Na bu tatako lowene home na yanowai home mata we tlome. Na bubë tële nimitelë gali të tëtatëme. Kwe kë enëne bume nimitelë wayo galibë të sle hana mëtëtatla. Bu kë tële nimitelë wayo galibë lowene hana mëtletëma.

9 Na hitu su lëtakefëtlebë ho eso ho Ferome gali tlole, “O ëjewa ekë lowene nelëfe. 10 Ëbame ju bo name hi wesibi ahujume tëglekefëtëbë ho name wame latlona. Na ju seme Potifarbë kalabusu lowa sike tle. 11 Kë mëta tafa telo. Na nimitelë hwi telo. Na sebobë nimitelë wayo gali bwa bwa. 12 Na Hibru mago falake ho sebona tafa tla na bu kalabusu lo bolijaya hobë wege fa lëtakefëtle. Na sebo bume nimitelë gali të tëtatelo. Na bu sebobë nimitelë wayo galibë olafa sle tëtatëna. 13 Na wesibi mefata wametle bu fene gali tlono. Bo jubë wege ita fa totlë, kwe ju hi wesibi ahujume tlekëfetëbë home ti mëta tabana kesi totle na bu lagliwa tle.”

14 Na eso ho Fero bu kë gali yafe aholokwane tlole. Na bubë wege home jine telëkakle, Josepme no nalëglëleme. Na kë ho Josepme kalabusu lo mago hokweinawa no tujuwelële. Na Josep bubë ëbehuba laba glo tle. Na lale ëho gegelo tle. Na eso ho Fero belë mëtlelula. 15 Na eso ho Fero Josepme gali lolole, “Bo nimitelë mehwi nanelë kwe bu nimitelë wayo galibë të hana mëtatëna. Bu lowene hana mëletëma. Kwe ho bu bome megali lamolona, ‘Ju nimitelë gali aholokwane eglena na ju nimitelë wayo galibë lowene sle ekoutëmeme.’ ” 16 Na Josep gali lolole, “Bo kwe hanane. Goto kwe fëyemene. Buwa jubë nimitelë wayo galibë olafa logotometëme. Kwe jubë tutune lowene tli lëgëbetëme.”

17 Na eso ho Fero Josepme gali lolole, “Bo nimitelë mehwi nanelë. Bo Nail tu helefo mëta nilibë. 18 Na bo 7 tatako bulmakau kleli hwi nolomë. Na bu tu mago fe mokoke lifijuwa. Na tu helefo mago agosaba hi hi mele. 19 Na tokwafe 7 bulmakau kleli tu mago mata fe mokoke na bu ato tika tanono na elebowa. Na bo këha ato tika tanono bulmakau kleli, Isip life mëta hwi hana nolomë. Hanane mu. 20 Na ato tika tanono bulmakau kleli tatako bulmakau klelime hi mele. 21 Bu wahi mele, kwe bubë ato sëse hana meletëme, otome fene mitlibe. Na ëje mata mëtabowa mëlibe. Na bo ni mago sagli nelëkaklë. 22 Na bo ita ni nëtebokwakë na ita li nimitelë hwi nelë. Witi hi wesibi jowa hulu lële na kë jowa witi mëta hi wesibi 7 këniji mëbe. Na bu tatako mële na lalemu mëbe. 23 Na tokwafe li witi hi wesibi jowa hulu lële na kë jowa witi mëta hi wesibi 7 këniji mëbe. Kwe bu tokwëtokwë mëbe na tëbo lamele. Na ona mago atëte tabo flelu ligisibë na lakokowa lotome. 24 Na kwe kë tokwëtokwë witibë tatako witime lahiwa mele. Na bo kë nimitelë gali waiyobëme, yanowai home yafe takune nolomë kwe bu bome nimitelë wayo galibë të sle hana mëtatëna.”

25 Na Josep eso ho Ferome gali tlole, “Jubë tële nimitelë gali kë nëgebë ebë jowa wayo galiwa. Goto bu wesibi jume wafi lebotane lëtatë. Na kë wesibi tokwafe fata lëgleme. 26 Na 7 tatako bulmakau klelibë, 7 tlibutume lëlekuju lële. Na 7 tatako witibë mata 7 tlibutume lëlekuju lële. Ebë tële nimitelë gali kë nëgebë jowa wayo galiwa. 27 Na 7 ato tika tanono bulmakau klelibë na 7 tokwëtokwë witibë, atëte tabo flelu kë koko totomebë, bu 7 tlibutume lëlekuju lële. Na kë 7 tlibutu, bu hi wesibi jwamu. Na bu foneme gigli mëglame. 28 Bo jume ëje wagali nolë. Goto bu wesibi jume wafi lebotane lotometë. Na kë wesibi tokwafe fata lëgleme. 29 Na 7 lale tlibutu migisina, Isip life mëta lebutako hi wesibi hulu mokoumemu. 30 Na tokwafe kë 7 lale tlibutu yawe mëglena, 7 tëbo tlibutu migisime. Na bu mana foneme gigli nëlame. Hi wesibi jwa nëgeme. Na iniwa enëne, lale tlibutu lowenebë aholokwana ti mëglame. Na tako fone Isip life tëbo logotlememu. 31 Kë 7 tlibutu kë migisibë, bu tëbo tlibutumu. Na oneho foneme gigli mëglame. Na iniwa oneho lale tlibutu lowenebë aholokwana ti mokoujame. 32 Goto bubë lowene këbë wesibi mëta wafi gwa lotle. Këme nëgeme, ju këha tële nimitelë këme hwi elome, ju kë wesibi lowene naegletleme.”

33 “Te, ju lale lowene home hohwi etamëme na hwi eloleme na aniji eloleme. Na kë hobë Isip life enëneme tafa nalëglelëmeme. 34 Na ju fli lale lowenena home aniji elomeme. Na 7 lebutako hi wesibi tlibutu migisina, kë enëne iniwa nuju mago hi wesibi loko mëtagujayame. Na bu tobali fu motomame. Na 4 fubë hi wesibi onehome sa mëtatëmame. Na jowa fubë hi wesibi gogwa lo mëta gogwa mulame. 35 Na lale lowenena ho bu lale tlibutuna kë fata mëglebë hi wesibi loko mëtagujayame. Na bu, jubë lokwalëfe mëta fwa wege melame. Na bu witi liji na fli hi wesibi, loko lo takowa loko mëtagujayame.” 36 Na 7 hi wesibi jwa tlibutu Isip lifate mëta fata mëglena, kwe Isip lifate mago oneho eso enëne kë loko mëgëtayabë lo mago hi wesibi glo mëlekefëyame. Këme nëgeme oneho foneme gigli hana mëglame.

37 Eso ho Fero na bubë wege ho, Josepbë gali yafe aholokwane mëtla na kë galibëme tako tole memëtletla. 38 Na eso ho Fero gali lolome, “Gotobë Amtëtomba, bu mëta tafa lëletle. Na sebo këha home fëye mago hohwi nëgëtayamene. Sebo këha home hohwi nëgëtayana, kwe sebo këha home hana hwi noglolame, Gotobë Amtëtomba tafa lëgletlebë home, sebo Josep mefwa aniji noglolame, Gotobë Amtëtomba tafa lëgletleme nëgeme.” 39 Na eso ho Fero Josepme gali tlole, “Goto buwa jume kë wesibi waolafa lotometë. Na li ho juha lowene ho hana tafa lële. Hanane mu. 40 Bo jume këme aniji nolë. Bobë life mago onehobë eso ho tafa naegletëmeme, jubë gali aholokwane melame na esogo melelëtëyome. Ju bobë lokwalëfe mëta fwa tafa eletenëme kwe bo tako eso homu tafa nelëme.”

41 “Bo jume Isip life tafa eglelëlebë home ekë aniji nolë.” 42 Na eso ho Fero bubë toba baliti tohwa lëtamë, na bu Josepbë toba ku mëta gelo lëtatle. Kë toba baliti eso home lëlekuju elamë. Na bu lale ëho Josepme gelo lëtatle na lale tliji mou mëta lehotle. 43 Na eso ho Fero bu kalë loha wesibi, wesibi Josepme lëlële. Hos kleli bu kë kalë loha wesibi, wesibime ki lokou. Na Josep bu këna na asë lëgëbelëfame. Na wege ho motoutaya na megali mëtlaguma, “Josep nagi kë lisiyo. Sobo alëge mago fë ebokwako.” Na kë lakalena, Josep, iniwa Isip onehome tokwefo eso home tafa tletëme.

44 Na eso ho Fero Josepme gali lolole, “Bo Isip lifebë tako eso ho na bo megali nelë. Isip life mago oneho bu bubë lowenenawa wesibi li hana mogotlame. Jume afina takune molëyome.” 45 Na eso ho Fero bu Josepme tiho weniji fë tëtatle, Safenat Panea. Na bu Potifera bokome yo tlole. Bubë weniji Asenat. Potifera bu Heliopolis life magobë fëso hi wesibi ahujume ahujume lëglekëfebë ho. Na Josep bu Isip lifate mëta tafa tle. Na bu Isip lifebë tokwëtokwë life elëme asë tëbelëfa.

46 Na Josep bu 30 tlibutu watle na eso ho Ferobë wege mana fa tëtatle. Na bu eso ho Ferobë lo kile lotle na Isip lifebë tokwëtokwë life elëme asë tëbelëfa. 47 Na kë 7 lale tlibutu migisina na feilawa lale hi wesibi fata mëgleme. 48 Na Josep bu kë hi wesibi loko tëtagwi na jowa jowa lifatebë nuju mago hi wesibi loko lo mëta gogwa tokou. 49 Na Josep bu kë loko tëtagwibë hi wesibi yafe tabei tle. Kwe bu feilawa wesibimu yenëba fenene na bu tabei hana tle manawa gogwa tle.

50 Na 7 tëbo tlibutu fata jwa mëtëglena, Josep no Asenat tële iko nëbale mana fata totome. Asenat Potiferabë boko na bu Heliopolis life magobë fëso hi wesibi ahujume ahujume lëglekëfebë ho. 51 Na Josep gali tle, “Goto bome lalaitanë. Na bobë afani kë tëbo mëtëtanabë na ilawa mago enëneme aholokwana ti nelë.” Na këme nëgeme bubë abwa nëba, Manase weniji këme fë totle. Manase gali wayo ebë aholokwana ti. 52 Na bu ita gali tle, “Goto bome nëbale tële tlënë, hobota kë fa togotlëbë lifate mëta.” Na këme nëgeme bubë li nëbame Efraim weniji këme fë totle. Efraim gali wayo ebë nëba walëlënë.

53 Na 7 lale tlibutu mutuju. 54 Na 7 tëbo tlibutu fata mëtle, Josep fene gali tle. Na fli life hi wesibi alujawamu. Kwe Isip life mëta hi wesibi mana metëbe. 55 Na tokwafe Isip life enëne tako foneme gigli mëtla. Na eso ho Ferome gali motlola, hi wesibi nalëglëmeme. Na eso ho Fero bume gali tlome, “Sobo Josep belë eyeume. Na bubë gali aholokwane sle elolome, some gali sle nalëglëyome, na sobo bubë gali esogo elelëtelome.” 56 Na Isip life mago enëne foneme tako gigli mëtla na Josep hi wesibi loko lo ino mana titika tokoutëme. Na këbë enëne kë hi wesibi balitina glo namëkoukefëyame. 57 Na fli life mago oneho mata foneme tako gigli memëtla, këme nëgeme bu Josep belë mitisikefëya, na hi wesibi balitina glo mëtlekefëya.