1 Gbalona e xa,

naxanye laxi e yɛtɛ ra

Siyon nun Samari geyane fari.

Ɛ tan muxu gbeene

naxanye na siya fisamantenna xun na,

Isirayila kaane xaxili tixi ɛ tan nan na.

2 Ɛ siga Kalene taan matodeni,

hanma Xamata, na taa gbeena.

Ɛ mɔn xa godo Filisiti bɔxɔni

Gati matodeni.

Ne fisa ɛ xa ba?

E bɔxɔn gbo ɛ gbeen xa?

3 Ɛ a mirixi

a ɲaxankata lɔxɔn mi ɛ lima,

koni ɛ a ligama nɛn

gbalon yi ɛ sɔtɔ.

4 Ɛ ɛ matabuma sade faɲin ma,

ɛ yɛxɛɛn nun ɲinge raturaxin donma,

5 ɛ sigin sa kondenna ra.

Ɛ yengi a ma, a ɛ fatan maxaseene ra

alo Nabi Dawuda.

6 Ɛ dɔlɔ gbegbe minma,

ɛ ture faɲin maso ɛ fatin ma.

Koni, ɛ mi kɔntɔfilixi

Yusufu bɔnsɔnna kala feen na.

7 Nanara, ɛ singe nan sigama konyiyani.

Ɛ sumunne danma nɛn.

8 Marigina Alatala bata a kɔlɔ a yɛtɛ yi.

Alatala, Ala Sɛnbɛn Birin Kanna falan ni ito ra:

“Yaxuba bɔnsɔnna wason bata raɲaxu n ma.

E yire makantanxine mi rafan n ma.

N fama e birin halagideni nɛn.”

9 Xa muxu fu banxina nde kui,

e birin faxama nɛn.

10 E kon kaan na so na banxini,

e binbine tongodeni,

a xa e gan,

a na naxan li banxini

a a falama nɛn na xa,

“Muxu gbɛtɛ mi be,

ba i tan na ba?”

A a yabima nɛn, “Ɛn-ɛn.”

A mɔn naxa, “I dundu,

i nama Alatala xinla fala!”

11 Bayo Alatala bata yamarin fi

a banxi gbeene nun banxi xurine,

e birin xa rabira, e kala.

12 Soone e giyɛ gɛmɛ yireni ba?

Ɲingene mɛnna biyɛ ba?

Awa, nanfera ɛ sariyan maxɛtɛma xɔlɛn na,

ɛ tinxinyaan maxɛtɛ fe ɲaxin na?

13 Ɛ ɲaxanma fe fuune ra.

Ɛ naxa, a ɛ fe bata sɔnɔya

ɛ yɛtɛɛn sɛnbɛn xɔn.

14 Alatala, Ala Sɛnbɛn Birin Kanna falan ni ito ra:

“Nanara, n kelima nɛn ɛ xili ma,

Isirayila yamana.

Ɛ tan naxanye Lebo-Xamata taani

han Araba xudeni,

siyana nde fama nɛn ɛ tɔrɔdeni.”