24
Alatala bɔxɔn birin halagima nɛn
1 Alatala bɔxɔn birin halagima nɛn,
a yi a raxɔri.
A bɔxɔ xɔnna kalama nɛn,
a yi a muxune birin naxuya ayi.
2 Na maraɲan ki kedenna nan saraxaraliin nun a yamaan xa,
e nun kuntigin nun a walikɛɛn xa,
e nun banxi kanna nun a walikɛ ɲaxanla xa,
e nun sare matiin nun sare soon xa,
e nun doli tongo nun doli soon xa,
e nun donla naxan ma
e nun seen soma naxan yii.
3 Bɔxɔ xɔnna kalama nɛn fefe,
a yigenla yi lu
amasɔtɔ Alatala bata na fala.
4 Bɔxɔn sunuxi, a xaraxi.
Dunuɲa sigama kalɛ,
a muxu gbeene fan yi doyen.
5 Adamadiine bata bɔxɔ xɔnna raharamu.
E mi Alaa sariyane suxi,
e yi a tɔnne beɲin.
E bata habadan layirin kala
e nun Ala tagi.
6 Nanara, Alaa dangan bata bɔxɔ xɔnna suxu,
a muxune yi e yulubin yanginna sɔtɔ.
A muxune ganma,
e wuyaxi mi lu.
7 Manpa nɛnɛn bata xara,
manpa binle yi lisi a ra.
Naxanye bɔɲɛ yi sɛwaxi,
ne wugama.
8 Sɛwan tanban xuine bata dan,
ɲaxaɲaxa xuine bata ɲan,
sɛwan bɔlɔn xuine bata dan.
9 Muxune mi fa manpaan minma sigini.
Manpane bata xɔlɔ ayi
e min muxune dɛ.
10 Taa rabeɲinxin bata kala.
Banxine birin nagalixi,
muxu yo mi fa nɔɛ soɛ.
11 Muxune gbelegbelema manpa feen na kirane xɔn.
Sɛwan bata findi bɔɲɛ rafɔrɛn na.
Ɲaxaɲaxan bata ɲan yamanani.
12 Banxi xɔnne nan tun fa luxi taani,
taan so dɛɛn bata kala,
a biraxin yi lu na.
13 A ligama na kii nin bɔxɔni siyane tagi,
se wuyaxi mi luma,
alo oliwi bogine na yelin malanɲɛ,
alo manpa binle xɔri bolon waxatini.
Dunuɲa muxune ɲaxanma
14 Naxanye luxi e nii ra,
ne e xuini tema,
e sɔnxɔ sɛwani e Alatalaa binyen nali.
E gbelegbelema ɲaxaɲaxani keli sogegododen binni.
15 E naxa,
“Sogeteden binna yamanane,
ɛ Alatala binya!
Ɛ Alatala xinla tantun
fɔxɔ ige tagi bɔxɔne yi,
Isirayilaa Ala!”
16 Nxu bɛti xuine mɛma nɛn bɔxɔn danne birin yi:
“Binyena Ala tinxinxin xa!”
Koni n tan naxa,
“N bata lɔ ayi, n bata lɔ ayi,
gbalona n xa!
Yanfantenne yanfan soma!
Yanfana!
Yanfantenne yanfan soma!”
17 Gaxun nun yili gbeen nun luti ratixine
ɛ tan bɔxɔ xɔnna muxune yɛɛ ra.
18 Naxan na a gi gbelegbele xuiin bun gaxuni,
na yi sin yinla ra.
Xa naxan te yinla ra,
na yi a suxu lutin na.
Kore xɔnna dɛɛne birin nabima nɛn
tulen yi fa,
bɔxɔ xɔnna bunne birin yi xuruxurun.
19 Bɔxɔ xɔnni bɔma nɛn,
a xuya ayi, a yolon,
bɔxɔn bata yimaxa fefe!
20 Bɔxɔn dingenma ayi nɛn
alo dɔlɔ minna,
a tintin alo gagen foye gbeen bun.
A bira a Ala matandine goronna bun
a mi fa nɔɛ kelɛ.
21 Na lɔxɔni,
Alatala sɛnbɛma ganla saranma e kɛwanle ra nɛn
naxanye bɔxɔn nun kuyen lan tagini
e nun bɔxɔ xɔnni ito mangane.
22 E malanma nɛn yili gbeen na
alo kasorasane.
E balan kasoon na.
Waxati xunkuye na dangu,
e fa e dɛntɛgɛ.
23 Kiken nun sogen yagima nɛn.
Amasɔtɔ Alatala Sɛnbɛn Birin Kanna
findima nɛn mangan na Yerusalɛn yi,
Siyon geyaan fari.
A binyen yi makɛnɛn taan fonne birin yɛtagi.