1 Siyon taana fe ra,

n mi n dunduma,

Yerusalɛn ma fe ra,

n mi n naxarama,

han a tinxinyaan yi makɛnɛn

alo sogen tematɔna,

a marakisin yi mayilen

alo xaye xidi dɛgɛne dimini.

2 Nayi, siyane ɛ tinxinna toma nɛn

mangane birin yi ɛ binyen to,

ɛ yi xili nɛnɛn sɔtɔ,

Alatala na naxan fala a dɛɛn na.

3 Ɛ findima nɛn manga kɔmɔti mayilenxin na Alatala yii,

e nun mangaya taxamaseri namuna ɛ Ala yii.

4 A mi fa falama ɛ ma sɔnɔn,

fa fala “Yama rabeɲinxina.”

A mi fa falama ɛ bɔxɔn ma sɔnɔn

fa fala “Bɔxɔ raxɔrixina.”

Koni ɛ xili bama nɛn

fa fala “N nafan yirena,”

a fala ɛ bɔxɔn ma

fa fala “Ɲaxalan futuxina.”

Bayo ɛ rafan Alatala ma,

a findima nɛn ɛ bɔxɔn kanna ra.

5 Ɛ diine ɛ yamanan masuxuma nɛn

alo banxulanna sungutunna futuma kii naxan yi,

ɛ yi findi sɛwan na ɛ Ala xa

alo ɲaxalandina a xɛmɛn nasɛwama kii naxan yi.

6 Yerusalɛn kaane, n bata kantan tiine dɔxɔ ɛ taan makantan yinna xuntagi,

kɔɛɛn nun yanyin na,

e mi e dunduma.

Ɛ tan naxanye taana fe rabirama Alatala ma

ɛ nɛma a maxandɛ,

ɛ nama ɛ matabu de!

7 Ɛ mɔn nama tin

a fan xa a raxara

han a yi Yerusalɛn rasabati,

bɔxɔ xɔnna muxune birin yi a tantun.

8 Alatala bata a kɔlɔ a yiifanna nun a sɛnbɛ gbeeni, a naxa,

“N mi fa ɛ bogi seene soma ɛ yaxune yii e balon na mumɛ,

xɔɲɛne mi fa ɛ manpa nɛnɛn minɲɛ mumɛ,

ɛ wali xɔnna.

9 Koni naxanye bogi seene xabama,

ne nan e donma

e Alatala tantun,

naxanye na manpa bogine malan,

ne nan e igen minma

n ma yire sariɲanxin yinna kui.”

10 Ɛ mini,

ɛ mini taan so dɛɛne ra!

Ɛ kirani tɔn yamaan yɛɛ ra!

Ɛ kiraan nafala,

ɛ a rafala, ɛ gɛmɛne ba a xɔn,

ɛ taxamasenni te, a siyane xa fa.

11 Ɛ a mato, Alatala a xuiin naminima

han bɔxɔn danne ra,

a naxa, “Ɛ a fala Siyon kaane xa,

ɛ naxa, ‘Ɛ a mato,

ɛ rakisimaan fama!

Ɛ a mato, a fama

e nun a muxu sɔtɔxine,

a kɔntɔnna biraxi a fɔxɔ ra.’ ”

12 A falama nɛn ne ma

a “Yama Sariɲanxina,

Alatalaa Muxu Xunbaxine.”

A falama nɛn ne ma

a “Ala Yamaan Naxan Xɔn Fenxi,

Taan Naxan Mi Fa Rabeɲinxi.”