6
Kitina Ala nun a yamaan tagi
1 Ɛ tuli mati Alatalaa falan na, a naxa,
“Ɛ keli, ɛ xun mafala,
geyane yi findi i ya kitin serene ra,
yire matexine xa i xuiin namɛ.
2 Geyane, ɛ Alatala kitin namɛ,
ɛ tuli mati,
ɛ tan bɔxɔn bunna naxanye mi yimaxɛ,
amasɔtɔ Alatala nun a yamaan kitini,
a waxi Isirayila makiti feni.
3 N ma yamana,
n nanse ligaxi ɛ ra?
N goronna mundun saxi ɛ xun ma?
Ɛ n yabi!
4 N bata ɛ ramini Misiran yamanani.
N bata ɛ xunba konyiya bɔxɔni.
N yi Musa rasiga,
a xa ti ɛ yɛɛ ra,
e nun Haruna nun Mariyama.
5 N ma yamana,
na feen xa rabira ɛ ma,
Moyaba mangan Balaki yi fe ɲaxin naxan falama,
e nun Beyori a dii Balami* Balaki nun Balami a fe sɛbɛxi Yatɛne 22 han 24 kui. mɔn a yabi naxan na.
Ɛ sigan naxan ti
keli Sitimi yi han Giligali taani,
na feen xa rabira ɛ ma
alogo ɛ xa Alatalaa tinxin wanle kolon.”
6 N fama nanse ra n yii Alatala yɛtagi,
n yi n xinbi sin Ala matexin bun?
N xa fa, nxu nun saraxa gan daxine ba?
E nun ɲinge diin ɲɛɛ kedenne ba?
7 Alatala konton wuli wuyaxine rasuxɛ ba?
Ture saraxan naxan gbo xude wuli wuli wuyaxine igen xa ba?
N na n ma dii singen soɛ a yii n hakɛne saren na ba?
Diin naxan minixi n fatini,
na findɛ niin xunbaan na yulubine fe ra ba?
8 Adamadina,
a bata a yita i ra naxan fan,
Alatala naxan maxɔdinma i ra:
Tinxinyaan liga,
hinanna yi rafan i ma,
i yi sigan ti i ya Ala xɔn yɛtɛ magodoni.
Isirayila kaane yulubine saranna
9 Alatala a xui raminima taan muxune ma,
xaxilimana a xinla ratinma nɛn.
Ɛ tuli mati falan na
naxan yamaan yulubine saranna ralixi
e nun naxan a fe ragidixi.
10 Nafunla naxan sɔtɔxi a ɲaxin na
na mɔn muxu ɲaxine banxine kui ba,
e nun ligase tinxintaren naxan dangan nafama?
11 N luyɛ n mi a fe saran na kanna ra ba,
naxan sikeli tinxintaren nawalima
se liga se dɛfetaren naxanye bɛnbɛli kui?
12 Taan nafulu kanne gbalon ligama,
a muxune wulen falama.
E dɛɛn yanfan tima.
13 Nanara, n tɔrɔn nagodoma nɛn i ma,
n yi i kala i yulubine fe ra.
14 I tan, i dɛgema nɛn i mi lugo.
Kamɛni i kuiin bɔrɔxɔma nɛn.
I sena ndee ramarama nɛn,
koni sese mi luma.
I na naxan namara,
n na kalama nɛn yɛngɛni.
15 I seen sima nɛn,
koni i mi a xabama.
I oliwi turen bama nɛn,
koni i mi a turen nawalima.
I manpa bogi igen bama nɛn,
koni i mi a minma.
16 I Manga Omiri a sariyane nan suxuma
e nun Manga Axabi a denbayaan misaale birin,† Isirayila mangane nan yi Omiri nun Axabi ra naxanye yi sɔn ɲaxu. E fe sɛbɛxi Mangane Singen 16.23-33 kui.
i bira e kawandi xuine fɔxɔ ra.
Nanara, n halagin nagidixi i ma,
n na i ya muxune findima nɛn gele ma feen na
e nun yagina siyane tagi.