1 Alatala, nanfera i makuyaxi nxu ra?

I luxunma nxu ma tɔrɔ waxatine yi nanfera?

2 Muxu ɲaxine bata waso ayi,

e mɔn yiigelitɔne bɛsɛnxɔnyama.

A e suxu a kɔtɛne ra.

3 A kanbama a nata ɲaxine yi.

Kumadena Alatala raɲaxuma,

a a mɛ a ra.

4 Muxu ɲaxina a falama dɛ ɲaxun na, a naxa,

“Ala mi muxe yulubine saranma e ra!

Ala mi na!”

A a miriyaan birin nan na ra.

5 A feen birin nasɔnɔyama.

A mi i ya kitine suxuma,

a mɔn yoma a yaxune ma.

6 A a falama a yɛtɛ ma, a naxa,

“N mi fulɛ mumɛ,

n mi luyɛ tɔrɔni mumɛ!”

7 A dɛɛn nafexi dangane nun wulene

nun fala xui xɔlɛne nan na.

A fe ɲaxin nun tɔrɔ feen nan tun falama.

8 A a luxunma banxidɛne ra,

a sɔntarene legedenma e faxa feen na.

A yɛɛ masama fangatarene ma wundoni.

9 A legedenna tima a luxundeni

alo yatana.

A saxi, a yiigelitɔne legedenma,

a e suxu a lutin na,

a e bubu, a e xali.

10 Fangatarene e felenma e bira,

e lu a nɔɔn bun ma.

11 A yi a fala a yɛtɛ ma, a naxa,

“Ala a fe mi a yi!

A bata a yɛɛne raxi. A mi n toɛ!”

12 Alatala, keli! I fangan mayita, Ala!

I nama ɲinan yiigelitɔne ma!

13 Nanfera muxu ɲaxina Ala raɲaxuma,

a yi a fala a yɛtɛ ma, a naxa,

“Ala mi n ɲaxankatɛ?”

14 Koni i tan Ala,

i tɔrɔn nun sɔxɔlɛn toma yati!

I xaxili luma nɛn ne xɔn ma mali xinla ma.

Fangatarene bata e yɛtɛ taxu i tan na.

Kiridi mali tiin nan i tan na.

15 Muxu ɲaxin fangan kala,

i yi a ɲaxankata a fe ɲaxine fe ra

han i yi a raxɔri.

16 Alatala nan mangan na habadan.

Suxure batune raxɔrima nɛn a bɔxɔn ma.

17 Alatala, i yiigelitɔne maxandi xuiin mɛma nɛn,

i yi e bɔɲɛn sɛnbɛ so.

I yi e wuga xuiin namɛ.

18 I xa sariya kɛndɛn sa kiridine xa

e nun muxu ɲaxankataxine.

Nanara, daɲɔxɔn mi fa magaxun tiyɛ sɔnɔn.