2 Kore xɔnna nan Ala a nɔrɔn mayitama.

Koren nan Ala a wanla makɛnɛnma.

3 Yanyin kawandin bama lɔxɔ yo lɔxɔ.

Dimin xaxili fima kɔɛ yo kɔɛ.

4 Xui yati mi a ra,

falane fan mi a ra.

Tunla mi e xuiin mɛma.

5 Koni, hali na,

e fala xuiin bɔxɔn birin lima,

e falane yi siga han dunuɲa danna.

Ala nan banxin nafalaxi sogen xa kore.

6 Sogen minima nɛn

alo xɛmɛn naxan minima a banxini

siga futu xidideni,

alo fangamaan naxan sigan tima a yɛtɛna a kiraan xɔn.

7 A minima sogetedeni,

a sa ɲan sogegododeni.

Sese mi luxunɲɛ a xɔlɔn ma.

8 Alatalaa sariyan kamalixi,

a muxun nii yifanma a ma.

Ɲɔndin nan Alatalaa maxadi xuine ra.

E xaxilitarene findima xaxilimane ra.

9 Alatala fe ragidixine tinxin.

A muxun bɔɲɛn nasɛwama nɛn.

Alatalaa yamarine nɔrɔxi.

A muxun xaxinla rabima nɛn.

10 Alatala a yɛɛragaxun sariɲan.

A buma habadan.

Ɲɔndin nan Alatalaa kitine ra,

e tinxin feu!

11 E fisa xɛmaan xa,

e fan xɛma faɲine birin xa.

E ɲaxun kumin xa,

dangu kumi xinden na.

12 I ya walikɛɛn xaxili sɔtɔma nɛn e xɔn.

A tɔnɔn gbegbe sɔtɔma nɛn e xɔn.

13 Nde nɔɛ a yɛtɛna tantanne birin kolonɲɛ?

I xa n ma hakɛ luxunxine mafelu.

14 N natanga tondin ma,

a nama n nɔ.

Nayi, n findima muxu dɛfexin na nɛn

naxan mi matandi ɲaxin tiyɛ.

15 Falan naxanye minima n dɛ,

e nun miriyaan naxanye n bɔɲɛni,

Alatala xa ne rasuxu sɛwani,

n kantan fanyena

e nun n xunbamana.