85
Ala xa bɔɲɛ xunbenla fi en ma
1 Koraa diine tantun bɛtina, bɛti baane kuntigin xa.
2 Alatala, i bata yi hinan i ya yamanan na.
I bata yi Yaxuba bɔnsɔnna sɛnbɛ so.
3 I bata yi i ya muxune hakɛne mafelu,
i yi e yulubine xafari.
Bɛti xuini te.
4 I bata yi i ya xɔlɔn ɲan,
i yi xɛtɛ i ya xɔlɔ gbeen fɔxɔ ra.
5 Ala, nxu rakisi muxuna,
i mɔn xa nxu sɛnbɛ so.
I nama fa lu xɔlɛ nxu ma.
6 I luma xɔlɔxi nxu ma nɛn ba
han habadan?
I ya xɔlɔn luma nɛn
han mayixɛtɛ nun mayixɛtɛ?
7 I mi fa nxu rakisima ba,
alogo i ya yamaan mɔn xa sɛwa i ya fe ra?
8 Alatala, hinan nxu ra,
i yi nxu rakisi.
9 N waxi n tuli mati feni Ala ra, Alatala.
A bɔɲɛ xunbenla nan ma fe falama a yamaan xa,
a muxu tɔgɔndiyaxine,
xa e mi fa xɛtɛ e xaxilitareyaan ma sɔnɔn.
10 A fama a yɛɛragaxu muxune rakisideni iki sa!
A binyen yi lu en ma yamanani.
11 Hinanna nun lannayana e bode xɔn ma.
Tinxinyaan nun bɔɲɛ xunbenla yi rakafu.
12 Lannayaan sabatima nɛn bɔxɔni,
tinxinna yi godo keli kore.
13 Alatala hɛrin fima nɛn en ma yati,
en ma bɔxɔn sansine yi sabati.
14 Tinxinyaan tima nɛn Marigin yɛɛ ra,
a kirani tɔn a xa.