106
Alaa fanna a muxune xa
Taruxune Singen 16.34-36
1 Tantunna Ala xa!
Ɛ Alatala tantun amasɔtɔ a fan.
A hinanna luma nɛn habadan!
2 Nde nɔɛ Alatalaa wali gbeene birin ma fe falɛ?
Nde nɔɛ tantunna birin fiyɛ a ma?
3 Sɛwan na kanne xa
naxanye a sariyane suxuma,
naxanye fe tinxinxin ligama waxatin birin.
4 Alatala, i nɛma i ya yamaan maliyɛ waxatin naxan yi,
i xaxili lu n xɔn ma.
I yi n fan mali
i nɛma e rakisɛ waxatin naxan yi,
5 alogo n xa i ya yama sugandixin sabatixin to,
alogo nxu nun i ya muxune xa sɛwa
nxu bode xɔn ma,
nxu birin yi nxu yɛtɛ matɔxɔ sɛwani.
6 Nxu bata yulubin liga
alo nxu benbane a liga kii naxan yi.
Nxu bata hakɛne nun fe ɲaxine raba.
7 Nxu benbane to yi Misiran yamanani,
ne mi yi i ya kabanako fe wanle yatɛxi.
E ɲinan nɛn na waxatine birin xɔn ma
i yi hinanma e ra waxatin naxanye yi.
E yi murutɛ Gbala Baan dɛ.
8 Koni a yi e rakisi a xili binyena fe ra,
alogo a sɛnbɛ gbeena fe xa kolon.
9 A yi falan ti Gbala Baan xili ma,
a yi xara ken!
A yi e ragidi igen tilinxi yire xareni
alo tonbonna.
10 Ala yi e rakisi na muxune ma
naxanye yi e raɲaxuxi.
A yi e xunba e yaxune yii.
11 E yɛngɛ faane yi faxa igeni.
Muxu yo mi lu.
12 Nayi, e yi la a fala xuine ra,
e yi tantun bɛtine ba a xa.
13 Koni Ala naxan ligaxi,
e ɲinan na xɔn mafurɛn,
e mi a mamɛ a yi feene rakamali,
14 Xɔɔyin yi e suxu tonbonni
e yi Ala bunba bɔxɔ xareni.
15 E naxan maxɔdin,
Ala yi na so e yii,
koni a yi furen fan nafa e ma.
16 E yi Nabi Musa maxɔxɔlɔn fɔlɔ,
e nun Haruna naxan nasariɲanxi Alatala xa.
17 Bɔxɔn dɛɛn yi rabi a Datan gerun.
A yi Abirami nun a muxune yɛ maluxun.
18 Tɛɛn yi e ganla gan,
a yi muxu ɲaxine suxu.
19 E yi xɛmaan nafala ɲinge dii sawura suxuren na Horebe Geyaan ma,
e yi seen batu naxan nafalaxi wuren na.
20 E yi Ala binyen masara ɲinge dii sawuran na
naxan sɛxɛn donma.
21 E ɲinan Ala xɔn
naxan e rakisixi
naxan wali gbeene kɛ Misiran yamanani.
22 A kabanako feene liga Xami bɔnsɔnna yamanani,
e nun fe magaxuxine Gbala baani.
23 Ala yi a fala a e raxɔrima nɛn,
fɔ a muxu sugandixin Musa a ti a yɛtagi
alogo a xa xɛtɛ a xɔlɔn fɔxɔ ra,
alogo a nama e birin halagi.
24 Awa, e yi e mɛ na bɔxɔ faɲin fan na
amasɔtɔ e mi yi laxi a falan na.
25 E yi lu a mafalɛ e bubune kui.
E mi Alatalaa falan namɛ.
26 Nanara, a yi a kɔlɔ e xili ma,
a e luma nɛn tonbonni e faxa,
27 a yi e yixɛtɛne raxuya ayi siyane yɛ,
a yi e raxuya ayi yamanane yi.
28 Alaa yamaan Baali-Peyori li waxatin naxan yi,
e yi saraxane don
naxanye yi bama ala fuune xa.
29 E kɛwanle yi Ala raxɔlɔ e ma
fure ɲaxin yi godo e ma.
30 Koni Finexasi yi keli,
a yi na feen dan,
na furen yi dangu.
31 Ala yi na yatɛ tinxinna ra a xa
waxati famatɔne yi han habadan.
32 E yi Ala raxɔlɔ Meriba igene dɛ,
Musa yi tɔrɔn sɔtɔ e fe ra.
33 E yi a liga Musa xɔlɔxin yi falan ti xaxilitareyani.
34 E mɔn mi siya gbɛtɛne faxa
Alatala tɔnna sa naxanye fe yi.
35 E yi basan siyane ra,
e yi lu e namunne ligɛ.
36 E yi e suxurene batu.
Na nan findi e rabira xunna ra.
37 E yi e dii xɛmɛne nun dii tɛmɛne ba saraxane ra ɲinanne xa.
38 E diidine faxa naxanye mi fefe kolon.
E ne ba saraxane ra Kanan suxure kidene yi,
bɔxɔn yi xɔsi na faxane fe ra.
39 E yi e yɛtɛ xɔsi e kɛwanle xɔn.
E suxure feene yi lu alo yalunyana Ala mabinni.* Na luxi nɛn alo yalunyana Ala yɛɛ ra yi bayo Ala waxi a yamaan xa tinxin a xa alo ɲaxanla lan a xa tinxin a xɛmɛn xa kii naxan yi.
40 Nanara, Alatala yi xɔlɔ a yamaan ma.
E yi raɲaxu a ma.
41 A yi e rabeɲin siyane yii,
e yi raɲaxu naxanye ma,
ne yi nɔɔn sɔtɔ e xun na.
42 E yaxune yi e ɲaxankata,
e yi e rayarabi e sɛnbɛni.
43 A yi a muxune xunba sanɲa ma wuyaxi,
koni e yi lu murutɛ,
e lu kankanɲɛ e hakɛne ma.
44 Koni, a to e wuga xuiin mɛ,
a yi e tɔrɔyaan to.
45 A yi a miri a layirina fe ma.
A yi diɲa a hinanna a fe ra.
46 Ala yi a liga a naxanye a yamaan suxi
ne yi kininkinin e ma.
47 Alatala nxɔ Ala, nxu rakisi.
I mɔn xa fa nxu ra keli siya gbɛtɛne yɛ,
alogo nxu xa i xili sariɲanxin tantun,
na yi findi nxu kanba xunna ra.
48 Barikan xa bira Alatala xa,
Isirayilaa Ala habadan han habadan!
Yamaan birin xa a ratin “Amina.”
Tantunna Ala xa!
*106:39: Na luxi nɛn alo yalunyana Ala yɛɛ ra yi bayo Ala waxi a yamaan xa tinxin a xa alo ɲaxanla lan a xa tinxin a xɛmɛn xa kii naxan yi.