2 Ala, n ma binyena,

n xaxili ragidixi yati!

N bɛtin bama nɛn, n yi i tantun!

3 N xulunma nɛn sinma,

n yi n ma bɔlɔnna nun kondenna maxa!

N kurunma bɛtin bɛ nɛn subaxa!

4 Alatala, n ni i tantunma nɛn siyane yɛ.

N bɛtin bama i xa nɛn bɔnsɔnne tagi.

5 I ya hinanna gbo han ariyanna.

I ya lannayaan texi han kore xɔnna.

6 Ala,

i ya binyen xa mayita kore xɔnna ma,

a yi bɔxɔn nafe!

7 I xanuntenne xunba,

i yi e rakisi i sɛnbɛni.

I yi n yabi.

8 Ala bata falan ti a yire sariɲanxini,

a naxa, “N nɔɔn tima nɛn,

n Siken taani taxun,

n yi Sukɔti lanbanna danne sa.

9 N tan nan gbee Galadi bɔxɔn nun Manase ra.

Efirami kaane findixi n ma yɛngɛsone nan na.

Yuda luxi nɛn

alo n ma mangaya dunganna.

10 Koni n ma konyin nan Moyaba yamanan na.

N tan nan Edɔn yamanan kanna ra.

N yɛngɛ sɔnxɔni tema Filisiti yamanani.”

11 Ala, nde sigama n na na taa makantanxini?

Nde tima n yɛɛ ra siga Edɔn yi?

12 Ala, i tan xa mi i mɛxi nxu ra ba?

I mi fa nxɔ ganla fɔxɔ ra sɔnɔn ba?

13 Nxu mali yaxune yɛngɛdeni!

Sese mi adamana maliin na.

14 Koni Ala na lu en xɔn,

en nɔɔn sɔtɔma nɛn.

A tan nan en yaxune halagima.