1 Tantunna Ala xa!

Sɛwan na kanna xa

naxan gaxuma Alatala yɛɛ ra,

a yamarine yi rafan a ma.

2 A diine sɛnbɛn sɔtɔma nɛn yamanani.

Muxu faɲine yixɛtɛne duban sɔtɔma nɛn.

3 E hɛrin nun nafunla sɔtɔma nɛn,

e sabatima nɛn tinxinyani habadan.

4 Kɛnɛnna tima nɛn muxu faɲine ma dimini,

naxanye kininkinin e mɔn tinxin.

5 A lan muxune xa donla so fonisireyani,

a yi a feene raba tinxinni.

6 Bayo tinxin muxun mi tantanɲɛ mumɛ!

Yamaan mi ɲinanɲɛ a fe xɔn habadan!

7 A mi gaxun xibaru ɲaxina fe ra.

A xaxili ragidi,

a yigi saxi Alatala nan fari.

8 A bɔɲɛn mi xuruxurunma,

a mi gaxuma.

Dɔnxɛn na,

a a yaxune biraxin toma nɛn.

9 A tan nan tɔrɔ muxune kima fonisireyani.

A tinxinyaan luma nɛn habadan!

A sɛnbɛn xun masama nɛn binyeni.

10 Muxu ɲaxin na na to,

a xɔlɔma nɛn,

a sunu, a yi a ɲinna raxin.

Muxu ɲaxin waxɔn feene kalama nɛn.