1 Tantunna Ala xa!

Ɛ Alatala xinla tantun!

Ɛ tan Alatalaa walikɛne, ɛ a tantun.

2 Ɛ tan naxanye tixi Alatalaa banxini

naxanye en ma Alaa banxin tanden ma.

3 Tantunna Ala xa! Amasɔtɔ Alatala fan.

Ɛ a tantun bɛtine yi, amasɔtɔ a diɲa.

4 Alatala nan Yaxuba sugandixi a yɛtɛ xa,

a yi Isirayila findi a gbeen na.

5 N na a kolon fa fala Alatala gbo,

en Marigin gbo alane birin xa.

6 Kore xɔnna nun bɔxɔ xɔnna ma,

fɔxɔ igene nun yire tilinxine birin yi,

naxan na rafan Alatala ma,

a na nan ligama.

7 A bata foyen nun tulen nakeli bɔxɔn danna ra,

a kuye sarinna ramini e nun tulena,

a foyen nakeli a ramaradeni.

8 A yi dii singene

nun xuruse dii singene faxa Misiran yamanani.

9 A yi kabanako feene liga ɛ tan Misiran kaane tagi,

Firawona nun a kuntigine birin xili ma.

10 A siya wuyaxine halagi,

a yi manga sɛnbɛmane faxa,

11 sa fɔlɔ Amorine Manga Sixɔn ma,

e nun Basan Manga Ogo

e nun mangan naxanye birin Kanan yamanani.

12 A yi e bɔxɔne so Isirayila yii e kɛɛn na,

a findi a yamaan kɛɛn na.

13 Alatala, i xinla fe luma nɛn habadan!

Mayixɛtɛne nun mayixɛtɛne e xaxili luma i xɔn ma nɛn.

14 Alatala a muxune xun mayɛngɛ kitin sama nɛn.

A kininkinin a walikɛne ma.

15 Gbetin nun xɛmaan nan tun siyane suxurene ra!

16 E dɛɛn na, koni e mi fala tima.

E yɛɛne na, koni e mi sese toma.

17 E tunle na, koni e mi fefe mɛma.

Niiraxili yo mi e yi.

18 Naxan na e rafala, a a yigin sa e yi,

na fan luma nɛn alo e tan.

19 Ɛ tan Isirayila yamana, ɛ Alatala tantun.

Ɛ tan saraxaraline, ɛ Alatala tantun.

20 Ɛ tan Lewi bɔnsɔnna, ɛ Alatala tantun.

Ɛ tan a yɛɛragaxu muxune, ɛ Alatala tantun.

21 Barikan bira Alatala xa Siyon yi,

a tan naxan luma Yerusalɛn taani.

Tantunna Ala xa!