N ma Ala, n ma mangana,

n ni i batuma.

N barikan birama i xa nɛn

habadan han habadan.

2 Lɔxɔ yo lɔxɔ n barikan birɛ i xa.

N ni i xinla tantunma nɛn

habadan han habadan.

3 Alatala gbo, a lan a yi tantun.

A gboon dan mi na.

4 Mayixɛtɛne birin xa i ya wanle fe fala

mayixɛtɛ famatɔne xa,

e yi i kɛwanle fe yɛba e xa.

5 E i ya binye gbeen nun nɔrɔna fe fala.

N luma nɛn n mirɛ i ya kabanako wanle ma.

6 E xa i sɛnbɛ magaxuxina fe fala.

N tan i ya gbona fe falama nɛn.

7 E xa i ya nɛmana fe fala,

e yi i ya tinxinna fe rali sɛwani.

8 Alatala diɲa, a kininkinin,

a mi xɔlɔn xulɛn, a hinanna gbo.

9 Alatala fe faɲin nabama muxun birin xa.

A kininkininma a daala birin ma.

10 Alatala, i ya dali seene birin i tantunma nɛn.

I ya tɔgɔndiya muxune birin barikan birama i xa nɛn.

11 E i ya mangayaan binyena fe falama nɛn.

E mɔn yi i sɛnbɛna fe yɛba

12 alogo muxun birin xa i kɛwanle kolon,

e nun i ya mangayaan binye gbeena.

13 I ya mangayaan findixi habadan mangayaan nan na.

I sɛnbɛn luma nɛn mayixɛtɛne nun mayixɛtɛne xun na.

Ala a dɛ xuine birin nakamalima,

a hinan a daala birin na.

14 Alatala ne malima nɛn

naxanye biraxi,

a yi muxune rakeli

naxanye felenxi.

15 Birin yɛɛn tixi i tan nan na

alogo i xa donseen so e yii a waxatini.

16 I tan nan i yiin nabima,

i yi donseen so niimaseene birin yii.

17 Alatala feen birin ligama tinxinna nin.

A hinan a kɛwanle birin yi.

18 Alatala maso na muxune ra

naxanye a xilima,

naxanye birin a xilima ɲɔndini.

19 A a yɛɛragaxu muxune rafan feene ligama nɛn,

a e xuiin mɛ, a yi e rakisi.

20 Alatala muxune kantanma

a rafan naxanye birin ma.

Koni a muxu ɲaxine birin halagima nɛn.

21 N na Alatala tantunma nɛn.

Dali seene birin xa a xili sariɲanxin tantun

habadan han habadan!