11
1 Liban bɔxɔna, i ya dɛɛne rabi.
Tɛɛn xa i ya suman binle gan.
2 Fɔfɔ binle, ɛ gbelegbele,
amasɔtɔ suman wudin bata bira.
Wudi gbeene bata kala.
Basan warine, ɛ gbelegbele,
amasɔtɔ fɔtɔn xɔlɛn bata kala.
3 Xuruse rabane bata gbelegbele,
amasɔtɔ e binyen waxatin bata dangu.
Yatane bata wurundun,
bayo fɔtɔn gbeen bata kala Yurudɛn baan dɛ.
Xuruse rabane
4 Alatala n ma Ala naxa iki:
“I xa xuruse kuru faxa daxini ito raba.
5 Muxun naxanye e sarama
ne e kɔɛ raxabama,
e kɛwali ɲaxin mi saran e ra.
Naxanye e matima ne naxa,
‘Alatala tantun!
N bata bannaya!’
E raba muxune mi kininkininxi e ma.
6 Amasɔtɔ n mi fa kininkininma yamanan muxune ma,”
Alatalaa falan nan na ra.
“N bata e birin lu e bode a yii ma,
e nun e mangana yiin ma.
E yamanan ɲaxankatama nɛn.
N mi muxu yo bama e yii.”
7 Nayi, n yi xuruse kuru faxa daxin naba, katarabi xuruse tɔrɔxine ma. N yi dungan firin tongo. N yi keden xili sa “Fanna,” bonna “Lanna.” N yi xuruse kurun naba. 8 N yi xuruse raba saxan kedi kike kedenna bun. Diɲan yi ɲan n yi, n fan yi raɲaxu xuruseene ma. 9 Nayi, n yi a fala ne xa, n naxa, “N mi fa ɛ rabama. Xa naxan faxama, a xa faxa. Xa naxan lɔma ayi, a xa lɔ ayi. Naxanye na lu, ne xa e bode suben don.” 10 N yi n ma fanna dunganna tongo n yi a yigira, alogo n xa n ma layirin kala n naxan xidi nxu nun siyane birin tagi. 11 A yi kala na lɔxɔni, nayi xuruse tɔrɔxin naxanye yi n matoma na lɔxɔni, ne yi a kolon a Alatalaa falan nan yi a ra. 12 N yi a fala e xa, n naxa, “Xa a ɛ kɛnɛn, ɛ n saranna fi, xanamu, ɛ a lu na.” E yi gbeti gbanan tonge saxan fi n saranna ra. 13 Alatala yi a fala n xa, a naxa, “A wolɛ ayi fɛɲɛ rafalan xa, e saran gbeeni ito naxan mirixi n xa.” N yi gbeti gbanan tonge saxanna tongo, n yi e woli Alatala banxini fɛɲɛ rafalan xa. 14 Na xanbi ra, n yi n ma lan dunganna fan yigira alogo n xa ngaxakedenyaan kala Yuda nun Isirayila tagi.
15 Alatala yi a fala n xa, a naxa, “I mɔn xa xuruse raba xaxilitarena waliseene tongo. 16 Amasɔtɔ n tan yɛtɛɛn xuruse rabana nde rafama nɛn yamanani. A mi a yengi dɔxɛ xuruseene xɔn ma naxanye lɔma ayi, a mi a dii xali nɛnɛne fenɲɛ, a mi a maxɔlɔxine dandanɲɛ, a mi a kɛndɛne baloɛ. Koni a yɛxɛɛ turaxine donma nɛn a yi e toron koten.”
17 Gbalon na xuruse raba fuyantenna xa,
naxan xuruseene rabeɲinma!
Silanfanna xa a yiin sɛgɛ* Silanfanna: Sofane yɛngɛso dɛgɛmana.
a yi a yiifari ma yɛɛn sɔxɔn.
A yiin xa faxa a ma fefe,
a yiifari ma yɛɛn yi xɔri.