Yuba.
4.
Nayi, Teman kaana Elifasi yi falan tongo, a naxa, 
“Xa n falan ti i xa, i nɔɛ diɲɛ na ma ba? Koni, nde nɔɛ a dundɛ? 
A mato, i bata muxu wuyaxi xaran, i yi sɛnbɛtarene madɛndɛn, 
naxanye yi birama, i ya falan yi ne rakeli, naxanye san yi xadanma, i yi ne mali. 
Iki, na bata i fan sɔtɔ, anu i bata yigitɛgɛ. A to i tan li, i yi kɔntɔfili. 
I ya lannantenyaan xa lu i ya Ala yɛɛragaxuni, i ya fɛtareyaan yi findi i yigin na.” 
“Awa, i miri, sɔntaren mundun bata halagi? Muxu faɲin mundun bata raxɔri? 
N naxan nakɔrɔsixi, naxanye hakɛ feene ligama e nun naxanye ɲaxankatan tima, ne na saranna sɔtɔma nɛn. 
Alaa foyen nan e halagima, a xɔlɔn tɛɛn yi e gan. 
Ala yatane wurundun xuiin nadunduma, a yi yata sɛnbɛmane ɲinne gira. 
Nayi, yatan faxama donsetareyaan nan na, yatana diine yi xuya ayi.” 
“Xibarun bata fa n ma alo wundona, n tunla bata ɲunuɲunun xuiin mɛ. 
Xiyene nɛma fɛ kɔɛɛn na, xixɔnla nɛma muxune fari, 
gaxu gbeen yi n suxu, n xɔnne birin yi xuruxurun. 
Yinnan yi dangu n yɛtagi, n fati ma xaben yi ramaxa. 
Sena nde yi tixi n yɛtagi, n mi yi naxan kolon, a nininna yi n yɛɛ ma. Na yi madundu, na xanbi ra n yi xuina nde mɛ, a naxa, 
‘Adamadiin tinxinɲɛ ayi dangu Ala ra ba? Muxun sariɲanɲɛ ayi dangu a Dali Marigin na ba? 
Xa Ala mi laxi a walikɛne ra, xa a fe ɲaxin to a malekane yi, 
a fa lɛ muxune ra nayi ba, naxanye bɛndɛ banxine kui, naxanye fatiye findixi bɛndɛn na, naxanye yibutuxunɲɛ alo laxaturane? 
E faxɛ nɛn lɔxɔ kedenni. E halagɛ nɛn habadan, muxe mi kɔntɔfili e fe ra. 
E bubune xidi lutine bata bolon, e faxama nɛn e fekolontareyani.’ ”