Yuba.
5.
“Iki, xinla ti i mali feen na! Muxuna nde na ba naxan i yabɛ? I falan tima maleka sariɲanxin mundun xa? 
Fe matandin nan xaxilitaren faxama. Xɔxɔlɔnya gbeen yi kɔmɔn faxa. 
N xaxilitaren to nɛn sabatɛ, koni dangan so nɛn a banxini xulɛn. 
Mali ti yo mi a diine xa, e bata yalagi taan kitisadeni, muxu yo mi e xunba! 
Kamɛtɔne a sansi bogine donma. Hali naxanye ɲanle tagi, e yi ne birin tongo, yiigelitɔne yi a yiiseene tongo. 
Hakɛn mi kelima bɔxɔn xan yi, sɔxɔlɛn mi solima bɔxɔni. 
Muxun daxi sɔxɔlɛn nan xili yi, alo tɛɛ budone to tuganma ayi.” 
“Xa n tan na yi a ra nun, n yi Ala nan maxandima, n yi n ma kɔntɔfinla yita Ala ra. 
A feen naxanye ligama ne gbo, e mi yɛɛ toɛ, a kabanako feene dan mi na. 
A tulen nafama bɔxɔn fari, a igen nafa xɛɛne ma. 
Muxun naxanye magodoxi, a ne yite. Naxanye sunuxi, a kisin fi ne ma. 
A muxu kɔtaxine miriyane kalama, e mi nɔ sɔtɔma e feene yi. 
A xaxilimane suxuma e yɛtɛna kɔtɛne nan xɔn, kɔtadene fe yitɔnxine kalama nɛn xulɛn. 
E soma dimini yanyi tagin nin, e tantanma yanyi tagini alo kɔɛɛn na a ra. 
Koni, a tan tɔrɔ muxun natangama fala ɲaxin ma naxan luxi alo silanfanna, a e rakisi sɛnbɛ kanna ma. 
Nayi, yigin sɛnbɛtaren xa, koni fala mi tinxintaren dɛ.” 
“Nayi, sɛwan na kanna xa Ala na naxan natɔrɔn! I nama i mɛ Ala Sɛnbɛ Kanna a xurun na. 
Amasɔtɔ a tan nan maxɔlɔn tima, a yi dandanna ti. A tan nan faxan tima, a mɔn yi marakisin ti. 
A i rakisɛ nɛn tɔrɔn ma dɔxɔɲa ma sennin, a i ratanga fe ɲaxin ma dɔxɔɲa ma solofere. 
A i rakisima nɛn faxan ma fitina kamɛni, a i rakisi silanfanna ma yɛngɛni. 
A i ratangama nɛn fala ɲaxin ma, i mi gaxuma halagin waxatini. 
Halagin nun fitina kamɛn bɔtɛ mi luma i xa, i mi gaxuma burunna subene yɛɛ ra. 
Gɛmɛ mi taranma i ya xɛɛn ma, hali burunna subene, yɛngɛ mi luma ɛ nun ne tagi. 
Bɔɲɛ xunbenla luma nɛn i konni. I na i ya xuruseene xun mato a ra, i a lima nɛn sese mi dasaxi. 
I ya diine wuyama ayi nɛn, i yixɛtɛne yigboma ayi nɛn alo sɛxɛna. 
I faxama foriyaan nin, alo murutuna a xaba waxatini.” 
“Nxɔ fe xɔnfenna xun soon nan na ra. I tuli mati na ra, i xaxili sɔtɔ.”