Yuba.
23.
Yuba mɔn yi falan ti, a naxa, 
“N ma mawugan mɔn findixi murutɛn nan na to, n yiin saxi n dɛ ra, koni n wuga xuiin mɔn minima. 
Xa n yi a kolon nun Ala dɛnaxan yi, n yi sigama nɛn han a konni, 
n yi n ma mawugan yita a ra, n yi n xɔnba fala wuyaxi ti a xa. 
Nayi, n yi a kolonma nɛn a n yabima falan naxan na, n yi a famu a naxan falama n xa. 
A yi kelɛ n xili ma a sɛnbɛ gbeeni ba? Ɛn-ɛn de, a yi a tuli matima nɛn n na. 
A yi a kolonma nɛn a muxu faɲin nan falan tima a xa. Nayi, n yi tangama nɛn kitin ma habadan.” 
“Koni, n na siga sogeteden binni, a mi na, n mi a toma sogegododen binni, 
n na a fen n kɔmɛnna ma, n mi a toma, n na xɛtɛ n yiifanna mabinni, n mi a toma. 
Anu, a n ma kiraan kolon. A na n fɛsɛfɛsɛ tɔrɔni, n sariɲanxin minima nɛn alo xɛmana. 
N biraxi a san funfun nan tun fɔxɔ ra, n lu a kiraan xɔn, n mi keli a xɔn. 
N mi tondi a yamarine suxɛ, n na a falane birin namara nɛn n bɔɲɛni. 
Koni, a na fena nde ragidi, nde a ligɛ a na masara? A na wa naxan xɔn, a na liga. 
A naxan nagidixi n ma, a na nan nakamalima, anu a mɔn na fe sifa wuyaxin nagidixi n ma yɛɛn na. 
Nanara, n gaxuma Ala yɛɛ ra. N na n miri, n gaxu a fe yi. 
Ala bata n tunnaxɔlɔ n ma, Ala Sɛnbɛ Kanna bata n nafe gaxun na. 
Koni hali dimin to so n ma, a yi n nabilin, hali n mi fa sese toma, n mi n dundu.”