Yuba.
28.
“Ɲɔndin na a ra, gbeti wure fixɛn geden na, xɛmaan fan nasariɲanden na, 
wuren bama bɛndɛn nin, wure gbeela fan bama gɛmɛn nin. 
Wuren fen muxune kɛnɛnna raminima dimin nin bɔxɔn bun, e godoma wuren fenɲɛ han a dandena, e wuren fen naxan luxunxi dimini bɔxɔn bun. 
Wuren fen muxune yili tilinxine gema burunna ra, muxu gbɛtɛ yo mi sigɛ dɛnaxan yi, e makuya muxu gbɛtɛne ra, e singanxin nan walima e yinle ra lutine ra. 
Bɔxɔ xɔnna donseen fima en ma, koni, a bunni maxaxi alo tɛɛn nan a ganxi. 
Gɛmɛ mamiloxi faɲine toma fanye yirene nin, xɛma fuɲin toma bɛndɛn nin.” 
“Dugane mi na bɔxɔ bun kirane kolon, sɛgɛn yɛɛn mi ne toma, 
burunna sube yo munma siga e xɔn, yata yo munma dangu e xɔn. 
Koni, muxun susuma fanyen gɛ, a yi geyane ge han e danna, 
a folon gema fanyene yi, a yi se kɛndɛne birin to a yɛɛn na, 
a yi xude xunne xɔri, naxan luxunxi, a yi na ramini kɛnɛnni.” 
“Koni, fekolonna minɛn yi? Xaxilimayaan dɔxi minɛn yi? 
Adamadiine mi a saren kolon, a mi niiramane yɛ bɔxɔ xɔnna fari. 
Fɔxɔ ige gbeena a falama, a naxa, ‘A mi n tan yii.’ Baan fan a falama, a naxa, ‘A mi n tan yii.’ 
Fekolonna mi sɔtɛ xɛmaan xɔn, a mi sarɛ gbeti fixɛn na, 
xɛmaan naxan kelima Ofiri yamanani, a mi sɔtɛ na ra, hanma onixi gɛmɛ tofaɲina, hanma gɛmɛ mamiloxi faɲina. 
A mi sɛ xɛmaan ma, a mi sɛ kilasi gɛmɛ fixɛ faɲin ma, a mi masarɛ xɛma faɲin goronna ra. 
A dangu korala gɛmɛ tofaɲin nun gɛmɛ gbɛtɛ ra naxan fixa alo dayimuna. Fekolonna dangu bɔxɔ bun nafunla birin na. 
Topasi gɛmɛ faɲin naxan keli Kusi yamanani, a mi sɛ na ma, a mi misalɛ xɛma sensenna ma.” 
“Nayi, fekolonna kelima minɛn yi? Xaxilimayaan dɔxi minɛn yi? 
A luxunxi niiramane birin ma, hali xɔliin naxanye kore xɔnna ma, ne mi a toma. 
Sayaan nun laxira yi a fala, e naxa, ‘Nxu a xinla nan gbansan mɛxi.’ ” 
“Koni, Ala a kiraan kolon, a tan nan keden a dɔxɔden kolon, 
bayo a tan nan toon tima han bɔxɔn danna, a seen birin toma kore xɔnna bun. 
A tan foyen sɛnbɛn danna saxi, a yi igene danna sa, 
a yi tulen danna sa, a yi galanna kiraan sa. 
Nayi, Ala yi fekolonna to, a yi a fɛsɛfɛsɛ, a yi a makɛnɛn. 
Na xanbi ra, a yi a fala adamadiine xa, a naxa, ‘Marigin yɛɛragaxun nan findixi fekolonna ra! Xaxilimayaan nan fe ɲaxin matangan na!’ ”