Yuba.
29.
Yuba mɔn yi falan ti, a naxa, 
“Xa n yi luyɛ nun alo waxati danguxine yi, na yi lanɲɛ! Na waxati danguxine yi, Ala yi yengi dɔxi n xɔn nun, 
a lɛnpun yi dɛgɛma n xun ma, n yi sigan tima a kɛnɛnna nin hali kɔɛɛn na. 
N yi kɛndɛ, Alaa xanuntenyaan yi n konni. 
Na waxatini, Ala Sɛnbɛ Kanna mɔn yi n xɔn, n ma diine birin mɔn yi n dɛxɔn, 
n yi n sanne maxama nɔnɔn fɛnɛn nan na, hali turen yi minima fanyeni n xa! 
Na waxatini, n na yi mini siga taan so dɛɛn na, n sa n ma gbɛdɛn dɔxɔ yamaan malandeni, 
banxulanne yi n to, e yi xɛtɛma nɛn, fonne yi keli, e lu tixi n yɛtagi, 
kuntigine yi e falan dan, e dundu, 
mangane yi e falane dan, e lɛnne yi xidi e dɛ kankeni. 
Muxu yo na yi n ma falane mɛ, na kanna yi a falama nɛn n ma a dubadiina. Muxu yo na yi n to, a yi n matɔxɔ, 
amasɔtɔ n yi yiigelitɔne ratangama naxanye yi e mawugama n xa, n yi kiridine ratanga muxu yo mi naxanye malima. 
Saya furen yi muxun naxanye ma, ne yi dubama n tan nan xa, n yi kaɲa gilɛn nasɛwama. 
Tinxinyaan yi ragodoxi n ma alo n ma domana, kiti kɛndɛn nan yi findixi n ma dugin nun n ma kɔmɔtin na. 
N tan nan yi findixi danxutɔɔn yɛɛne ra, n tan nan yi madɔntɔɔn sanne ra. 
N yi findixi tɔrɔ muxune fafe ra, n yi xɔɲɛne xun mayɛngɛ kitini. 
N tan nan yi tinxintarene sɛnbɛn kalama, n yi e se tongoxine ba e yii. 
Nayi, n yi a fala n yɛtɛ ma, n naxa, ‘N faxama nɛn sabatini, n ma lɔxɔne gboma ayi nɛn alo ɲɛmɛnsinna, 
n luma nɛn alo wudina, naxan salen sinxi igeni, xiila sama naxan yii ra kɔɛɛn na. 
N ma binyen gboma ayi nɛn, n sɛnbɛn mi ɲanma mumɛ, a lu alo xali bandunxina.’ ” 
“Na waxatini, muxune yi e tuli matima n na sabarini. N na yi e kawandi, e yi e dundu. 
N na yi falan ti, e mi yi a matandima. N ma falane yi luxi nɛn e xa alo tulen naxan godoma bɔxɔ xaren ma. 
E yi n mamɛma nɛn alo e tulen mamɛma kii naxan yi, e dɛɛne yi lu yibixi n bun alo muxun naxanye tulen mamɛma soge furen na. 
E na yi yigitɛgɛ, n yi e ralimaniya, e mi yi wama fula feni n ma fanna ra. 
N tan nan yi dɔxi e xun na, n kiraan yita e ra, alo mangana a ganla xun na, alo muxun naxan tɔrɔ muxune masabarima.”