Yuba.
30.
“Koni iki, n bata findi magele seen na diidine xa, naxanye babaye yi raɲaxu n ma, han n mi yi tinɲɛ e lu n ma barene yɛ n ma xuruseene kantandeni. 
E babane yi nɔɛ nanse ligɛ n xa e sɛnbɛni? E sɛnbɛn birin bata yi ɲan. 
Kamɛn nun tɔrɔn bata yi e raxadan, e yi donseen fenma tonbonna nin, 
e yi donseen fenma fɔtɔnne nin burunna ra, budemaan nan tun yi e yii balon na. 
E yi kedixi muxune yɛ, muxune gbelegbele e fɔxɔ ra alo muɲadene nan yi e ra. 
E yi e banxine tima geya kankene nan na, e nun yili yirene nun faran yinle ra. 
E yi wugama fɔtɔndine nin alo sofanle, e yi sa e sa ɲanle yi. 
Xaxilitarene nan ne ra, xili mi e ra, naxanye yi kedima gbelemɛn na yamanani.” 
“Koni iki, n bata findi magele seen na e sigine yi, e lu n konbɛ tun. 
N naɲaxu e ma, e masigama n na. E mi sikɛma dɛgen naminɛ n yɛtagi. 
Bayo Ala bata n sɛnbɛn kala, a yi n nayarabi, e mi fa yagima feen ligɛ n na. 
Muxu kobine kelima n xili ma n yiifanna ma, e katama n nabiradeni e sanne ra, e n yɛngɛma alogo e xa n halagi. 
E bata n ma kirane kala. Birin kataxi gbalon xa n sɔtɔ, e mako mi muxu yo ma na feni. 
E fa n yɛngɛma alo sofane na fu taan ma e yinna rabira. E mi sikɛma fadeni n xili ma n ɲaxankata waxatini. 
Gaxun bata n nabilin, n ma binyen bata siga alo foyen nan a xalixi, n ma hɛrin waxatin bata dangu alo kundana.” 
“Iki, n niin bama n yi. Tɔrɔ lɔxɔne bata n li. 
Xɔlɛna n suxuma kɔɛɛn na han n xɔnne, naxan dan mi na. 
Ala n suxuma a sɛnbɛn birin yi n ma domaan ma, a yi n yidɛtɛn alo doma kɔɛɛn naxan muxune kɔɛni dɛtɛnma. 
A bata n woli boroni. N bata lu alo xuben nun burunburunna.” 
“N ma Ala, n na i xilima, koni i mi n yabima. N tima i yɛtagi, koni i n matoma nɛn gbansan. 
I bata i yɛɛ xɔdɔxɔ n ma, i n yɛngɛ i sɛnbɛn birin na. 
I bata n lu foyeni, a lu sigɛ n na. Wuluwunla n xalima na xun xɔn. 
N na a kolon a i n xalima sayaan nin, niiramane birin sigama dɛnaxan yi.” 
“N mi yi tɔrɔ muxune mali ba, naxanye n xili e ɲaxankatani? 
Naxanye yi tɔrɔxi, n mi wuga ne xɔn ba? N bɔɲɛn mi yi sunu yiigelitɔne fe ra ba? 
N yengi yi fe faɲine nan ma, koni fe ɲaxine bata fa. N yi kɛnɛnna nan mamɛma, koni dimin bata fa. 
Xabu tɔrɔna n sɔtɔ, n kui seene ɲinma. 
N sigan tiin dimin nan tun yi, n mi sogen toma mumɛ! N tima yamaan tagi, n yi e mafan n mali feen na, 
n wuga xuiin minima alo kankone, alo dangaranfulene. 
N fati kidin bata fɔrɔ n ma, a yi koyen. Fati mawolonna bata n xɔnne yili. 
N ma kondenna bata findi sunu sigi sa seen na, n ma xulenna yi findi wuga seen na.”