Yuba.
35.
Nayi, Elihu mɔn yi falan ti, a naxa, 
“I laxi a ra a ɲɔndina i xa ba? I yi a fala, i naxa, ‘N tinxin Ala yɛɛ ra yi.’ 
Koni, i mɔn a falama, i naxa, ‘N to mi yulubi ligaxi, na tɔnɔn nanse ra n tan xa?’ ” 
“Awa, n tan nan i yabima, e nun i xɔyin naxanye i fɛma. 
I yɛɛn ti kore, i kundaan mato, e mate i xun ma pon! 
Xa i yulubin liga, na sa Ala tɔrɛ mɛnni ba? I ya murutɛn na gbo ayi, na nanse ligɛ a ra? 
Xa i tinxin, na nanse fima Ala ma? A nanse sɔtɔma i yii na ma? 
I ya fe ɲaxine muxune nan tun tɔrɔma, i ya tinxinyaan munanfanna muxune nan ma.” 
“Ɲaxankatan na gbo ayi yamaan ma, e mawugama nɛn. Sɛnbɛmaan na e tɔrɔ, e xui ramini malina fe ra. 
Koni, muxu yo mi a falɛ, a naxa, ‘Ala minɛn, a tan naxan n daxi? A muxune rawɛkilɛma e bɛtin ba dimini, 
a en xaranma burunna subene kɛɲane xɔn. A fekolonna fi en ma xɔline kiine xɔn.’ 
Na muxune gbelegbelema malina fe ra, koni Ala mi e yabima, bayo e tan findixi fe ɲaxi rabane nun wasodene nan na. 
E gbelegbelema fuyan, Ala mi e ramɛma, Ala Sɛnbɛ Kanna mi a tuli matima e xuiin na. 
A i xuiin namɛma di nayi, i tan naxan a falama a i mi a toma? I yi a fala a i bata i ya kitin so a yii, i a tan nan mamɛma! 
Iki, bayo Alaa xɔlɔn munma fa, e nun a mi a tuli matixi murutɛ falane ra, 
nayi, Yuba luma a fala fuun nan tun tiyɛ, a yi fekolontare falane rawuya ayi.”