Yaburina.
2.
Nanfera siyane murutɛma? Nanfera yamanane muxune yanfa fuune soma? 
Dunuɲa mangane bata tondi, kuntigine bata e malan Alatala nun a muxu sugandixin xili ma. 
E naxa, “En xa en yɛtɛ ba e nɔɔn bun, en xa en xunna ba e yamarin bun.” 
Marigin naxan ariyanna yi na gelema e ma. 
A fitinaxin yi falan ti e xili ma, a e magaxu a xɔlɔni, 
a naxa, “N bata n ma mangan dɔxɔ n ma geya sariɲanxin fari Siyon yi.” 
Mangan fan naxa, “Alatala bata naxan nagidi, n na a ralima nɛn: a naxa n na, ‘N ma dii xɛmɛn nan i tan na. N bata findi i fafe ra to. 
N maxɔdin, n siyane soma nɛn i yii i kɛɛn na, bɔxɔn danne birin yi findi i gbeen na. 
I e nɔma nɛn mangaya wure dunganna ra, i yi e rayensenɲɛ ayi alo fɛɲɛna.’ ” 
Nayi, ɛ tan mangane, ɛ xaxili fen. Ɛ tan dunuɲa kuntigine, ɛ kawandin namɛ. 
Ɛ Alatala batu, ɛ gaxu a yɛɛ ra, ɛ sɛwa, ɛ xuruxurun. 
Ɛ dii xɛmɛn mafan, alogo a nama xɔlɔ, a yi ɛ raxɔri. Bayo, a bɔɲɛn mafura tɛ. Sɛwan ne xa, naxanye e yigiya a ma.