Yaburina.
5.
Dawudaa bɛtina, bɛti baane kuntigin xa. A xa ba xulenna ra. 
Alatala, i tuli mati n fala xuine ra, i yi i tuli mati n kutun xuiin na. 
N ma Ala nun n ma mangana, i tuli mati n ma wuga xuiin na. N ni i tan nan maxandima. 
Alatala, xɔtɔnni i n xuiin namɛma. Xɔtɔnni, n na n yitama i ra, n yi i ya yabin mamɛ. 
Ala mi i tan na fe ɲaxin nafan naxan ma. I mi tinɲɛ muxu ɲaxi yo ra i yɛtagi. 
Wasodene mi tiyɛ i yɛtagi. I fe ɲaxi rabane birin naɲaxuma nɛn. 
I wuledene halagima nɛn. Alatala faxa tiine nun yanfantenne raɲaxuma nɛn. 
Koni n tan soma nɛn i konni i ya hinan gbeen xɔn ma, n ni i batuma nɛn i ya Banxi Sariɲanxini. 
Alatala, ti n yɛɛ ra i ya tinxinni n yaxune e fe ra. I ya kiraan yita n na. 
N mi lɛ n yaxune fala xui yo ra, e waxi fe kalan nan tun xɔn ma. E kɔɛ yinle rabixi alo gaburuna, yanfa falane nan e lɛnne ma. 
Ala, e yalagi, e kɔtɛne xa findi e yɛtɛ bira xunna ra. E kedi i yɛtagi e matandine fe ra, bayo e bata murutɛ i ma. 
Koni ne birin xa ɲaxan, naxanye e luxunxi i yi. E xa bɛtin ba sɛwani habadan! Na muxune ratanga i xinla rafan naxanye ma, e yi sɛwa i ya fe ra! 
Alatala, i tinxin muxune barakama nɛn, i yi e rabilin fanna ra i yi e ratanga alo yɛ masansan wure lefana.