Yaburina.
12.
Dawudaa bɛtina, bɛti baane kuntigin xa. A xa ba kondenna luti solomasɛxɛn na. 
Alatala, nxu mali, bayo muxu tɔgɔndiyaxine bata ɲan. Dɛnkɛlɛya muxu yo mi fa adamadiine yɛ. 
Birin wulen falama a boden xa. E e bode yanfa wule matɔxɔn xɔn. 
Alatala, na muxune dɛɛn suxu naxanye wule matɔxɔn tima, e nun muxu dɛ raɲaxuxine, 
naxanye a falama, e naxa, “Nxu nɔɔn sɔtɔma nxu fala xuine nan xɔn. Nxu dɛɛn fatan han! Nde nxu nɔɛ?” 
Awa, Alatala naxa, “Bayo yiigelitɔne ɲaxankataxi, e nun tɔrɔ muxune wugama, nba iki, n bata keli, n na e ratangama nɛn naxanye raɲaxuxi.” 
Alatalaa falane, fala sariɲanxin nan e ra alo gbeti fixɛna naxan nasɛnsɛnxi sulun tɛɛn na han sanɲa ma solofere. 
Alatala, i nxu kantanɲɛ, i nxu ratanga muxu sifani itoe ma habadan. 
Na muxu ɲaxine e kanbama yiren birin yi bayo Adamadiine fe fuune yatɛxi.