Yaburina.
21.
Dawudaa bɛtina, bɛti baane kuntigin xa. 
Alatala, mangan bata sɛwa i fangan na. A sɛwan gbo bayo i bata a rakisi. 
A waxi naxan xɔn, i tinxi na ma. I bata a maxandin yabi. 
I bata a rasɛnɛ duba faɲine ra, i mɔn yi xɛma mangaya taxamasenna so a xun na. 
A maxɔdinna ti nɛn a siimayana fe ra, i yi sii xunkuyen so a yii, naxan luma habadan. 
A binyen bata gbo ayi fata i ya marakisin na. I nɔrɔn nun xunnayerenna fixi nɛn a ma. 
I a barakama habadan! I a ralugoma sɛwan na i yɛtagi. 
Bayo Mangan yigin saxi Alatala nin, a kantanxi Kore Xɔnna Ala hinanna nan baraka yi. 
I tan i yaxune birin suxuma nɛn. Naxanye i raɲaxuxi, i ne suxuma nɛn i fangan na. 
I na mini kɛnɛnni waxatin naxan yi, i e ɲanma nɛn alo sulun tɛɛna. Alatala xɔlɔxina e halagima nɛn tɛɛn yi e gan. 
I e yixɛtɛne raxɔrima nɛn dunuɲa yi, e nun e bɔnsɔnne adamadiine yɛ. 
Hali e fe ɲaxini tɔn i xili ma, e mɔn yi e miri kɔtɛ ɲaxine ma, e fulama nɛn. 
Bayo, i na i ya xalimakunle ti e ra, e e xun xanbi soma nɛn, e yi e gi. 
Alatala xa batu a sɛnbɛ gbeena fe ra. Nxu bɛtin bama nɛn, nxu yi i tantun i fangana fe ra.