Yaburina.
22.
Dawudaa bɛtina, bɛti baane kuntigin xa. A xa ba alo bɛtin naxan xili: “Xɔtɔnna Xɛli Gilɛna.” 
N ma Ala! N ma Ala! I n nabeɲinxi nanfera? Nanfera i ya marakisin makuyaxi n na? Nanfera i mi n kutun xuiin namɛma? 
N ma Ala, n ni i xilima yanyin na, koni i mi n yabima. Hali kɔɛɛn na, n mi n dundɛ. 
Koni i tan sariɲan, i ya mangaya gbɛdɛn nabilinxi Isirayilaa tantunna ra. 
Nxu benbane yigin saxi i tan nan yi. E e yigin sa i yi, i yi e ratanga. 
E to e xui ramini i ma, i yi e xɔrɔya. E yigin saxi i yi, nanara, e mi yagixi. 
Koni daɲɔxɔ mi fa n tan na sɔnɔn. N ligaxi nɛn alo kunla adamadiin naxan naɲaxuxi yamaan naxan bɔtɛ raba. 
Naxanye na n to, e yo n ma. E yi e dɛɛn bɛtɛxun, e e xunne yimaxa. 
E naxa, “A tan naxan Alatalaa fe yi, Alatala a ratangama ba? Xa a rafan Alatala ma, a xa a xunba.” 
Koni i tan nan n naminixi nga kuini, i yi n sa nga kanken ma. 
Xabu n bari lɔxɔni, n taxuxi i ra. N ma Ala nan i ra, xabu n yi nga kuini waxatin naxan yi han iki. 
I nama i makuya n na. Tɔrɔn bata maso n na, muxu yo mi na yi naxan n maliyɛ. 
N yaxune n nabilinxi alo turane, alo Basan yamanan tura xaɲɛne. 
E dɛɛne yibixi alo yatane, e wurundunma n ma, e xa n yibɔ. 
N fangan bata ɲan alo ige bɔxɔnxina. N xɔnne birin bata ba e bode ra. N bɔɲɛn bata liga alo dolen na yilo. 
N fangan bata ɲan feu! N lɛnna xaraxin bata kankan n dɛ. I bata n sa faxa bɛndɛni. 
Muxu ɲaxi ganla bata n nabilin alo barene. E bata n yiine nun n sanne mabɔ. 
N xɔnne birin kɛnɛnni. E yɛɛne kankanxi n na. 
E bata masɛnsɛnna ti n ma dugine fe ra, e xa e yitaxun e bode tagi. 
Alatala, i nama i makuya n na! N ma sɛnbɛmaan nan i tan na. N mali iki sa! 
N niin xunba silanfanna yii. N natanga bareni itoe ma. 
N nakisi yatani itoe ma. N nakisi burunna turaan fenne ma. 
N na i xinla ralima nɛn ngaxakedenne ma. N ni i matɔxɔ nɛn yamaan yɛ. 
Ɛ tan naxanye gaxu Alatala yɛɛ ra, ɛ a matɔxɔ. Ɛ tan Yaxuba bɔnsɔnna, ɛ a binya. Ɛ tan Isirayila kaane, ɛ gaxu a yɛɛ ra. 
Bayo, a mi a mɛxi yiigelitɔne tɔrɔne ra, a mi a rabeɲinma. A mi a yɛtagin luxunma a ma. Fɔ a a xandi xuiin namɛ. 
N ni i tantunma yamaan malan gbeeni. N na n ma dɛ ti xuine rakamalima nɛn i yɛɛ ragaxu muxune yɛɛ xɔri. 
Yiigelitɔne xa e dɛge, e lugo. Naxanye Alatala fenma, ne xa a matɔxɔ. Ala xa siimayaan fi ɛ ma habadan! 
Bɔxɔn danna muxun birin e xaxili luma nɛn Alatala xɔn, e yi e yɛɛ rafindi a ma. Siyane bɔnsɔnne birin a batuma nɛn. 
Bayo, Alatala nan mangan na siyane xun na. 
Nafulu kanne fan fama nɛn e dɛgedeni, e a batu. Naxanye birin xɛtɛma bɛndɛni, ne xinbi sinma nɛn a bun ma, naxanye mi nɔɛ e niin nakisɛ. 
Waxati famatɔɔn muxune walima a xa nɛn Marigina a fe falama nɛn mamandenne xa. 
A tinxinyaan fama nɛn nalideni muxune ma naxanye munma bari, Ala bata na ragidi.