Yaburina.
27.
Dawuda gbeena. Alatala nan n ma kɛnɛnna nun n ma kisin na. N xa gaxu mundun yɛɛ ra? Alatala nan n ma dunuɲa yi gidin xun mayɛngɛ muxun na. Nde n magaxuɛ? 
Muxu ɲaxine na keli n xili ma alogo e xa n halagi, yaxune na n yɛngɛ, e tan nan dagalanma ayi nɛn, e bira. 
Hali sofa ganla na n nabilin, n bɔɲɛn susuma nɛn. Hali yɛngɛ gbeen na keli n xili ma n yigin tixi. 
N bata Alatala maxɔdin fe keden ma. N fe keden peen nan fenma. N lu Alatalaa banxin kui han n siin soge danna. N Alatala wali faɲin kolon, n yi lu a batuɛ a banxini. 
Amasɔtɔ a n namarɛ nɛn a banxini tɔrɔ waxatini. A n luxunɲɛ nɛn a Batu Banxini. A n natema nɛn geyaan xuntagi. 
A xunna kenla fima n ma nɛn n yaxune tagi. N saraxane bama nɛn Ala Batu Banxini, n sɔnxɔ sɛwani. N bɛtin bama nɛn, n na Alatala tantun. 
Alatala, i tuli mati n xuiin na, n na i xili waxatin naxan yi. Kininkinin n ma, i yi n yabi! 
N bɔɲɛn waxi i fen feni. Alatala, n ni i fenma, 
i nama i yɛtagi luxun n ma! I nama i ya walikɛɛn kedi xɔlɔni. I bata findi n mali muxun na. I nama n nabeɲin, i nama i mɛ n na, n nakisimana Ala. 
Hali nga nun n fafe n nabeɲin, Alatala n yisuxuma nɛn. 
Alatala, n xaran sigati kiin ma. Ti n yɛɛ ra kira faɲin xɔn ma, amasɔtɔ n yaxune wuya. 
I nama n so n yaxune yii, amasɔtɔ wule serene bata keli n xili ma, e e kɔnkɔma n ma. 
N mɔn laxi ito ra: n na Alatalaa nɛmaan toma nɛn dunuɲa yi. 
I xaxili ti Alatala ra! I sɛnbɛ so! I bɔɲɛn xa limaniya! I xaxili ti Alatala ra!