Yaburina.
32.
Dawudaa fala ɲaxumɛna. Sɛwan na kanna xa naxan ma matandine bata mafelu naxan yulubine bata xafari. 
Sɛwan na adaman xa Alatala bata diɲa naxan hakɛn ma e nun mayifu mi naxan yi. 
N to munma yi n ti n hakɛne ra nun, fɛriɲɛn gbɛn kutunne yi n nayelefuma. 
I ya tɔrɔn yi n fari kɔɛɛn nun yanyin na. Fangan yi ɲan n na a liga alo n tonbon yiren nin. 
Awa, n yi n ti n yulubine ra i xa. N mi n ma hakɛ yo luxun i ma. N naxa, “N na n tima nɛn n ma matandine ra Alatala xa.” Awa, i yi n hakɛne nun yulubine birin ba n ma. 
Nanara, muxu tɔgɔndiyaxine birin xa i mafan a waxatini, alogo fufaan na fa, a nama e li. 
N luxunden nan i tan na. I tan nan n natangama tɔrɔn ma, yamaan birin yi xɔrɔya bɛtine ba. 
Nanara, n na ɛ xaranma kiraan ma ɛ birɛ naxan fɔxɔ ra. N na ɛ kawandima, n yi n yengi sa ɛ xɔn. 
I nama findi daxun na alo soona hanma sofanla naxanye mi sigɛ fɔ karafen na bira e ma. 
Muxu ɲaxine tɔrɔn gbo. Koni naxanye e yigi saxi Alatala yi, a ne rabilinma nɛn hinanna ra. 
Ɛ tan tinxin muxune xa ɲaxan Alatala a fe ra, ɛ sɛwa, ɛ bɛtin ba, ɛ tan muxu sɔndɔmɛ faɲine.