Yaburina.
35.
Dawuda gbeena. Alatala, n kiti muxun makiti. I n yɛngɛfaan yɛngɛ. 
Keli, i ya wure lefane tongo i fa n mali. 
I ya tanban nun bunbini te ne xili ma naxanye n fɔxɔ ra. A fala n xa, a i tan nan n nakisima. 
Ala xa ne rayagi a e rayarabi, naxanye katama n faxa feen na! Naxanye fe ɲaxine yitɔnma n xili ma, Ala xa ne yɛ yifu a e raxɛtɛ! 
E xa liga alo foyen sigama se dagin naxan na. Alatalaa malekan xa e kedi. 
Ala xa e kirani fɔrɔ, a salaxunɲɛ ayi, Alatalaa malekan yi e sagatan. 
E lutin natixi nɛn n yɛɛ ra fuu! E yili ratilinxin ge n suxu feen na. 
Nanara, e xa e tɛrɛna halagin na, e suxu e luti ratixin na, e bira, e faxa. 
Nayi, n niin sɛwama nɛn Alatala ra. N ɲaxan a marakisina fe ra. 
N na falɛ n bɔɲɛn ma feu! N naxa, “Muxu yo mi luxi alo i tan Alatala. I yiigelitɔne ratangama fanga kanne ma. I tɔrɔ muxune ratanga ne ma naxanye e yigbɛtɛnxi.” 
Muxu ɲaxine n kansunma. E sɔnne sama n na, n mi naxanye fe kolon mumɛ! 
E n ma fanna ɲɔxɔ a ɲaxin na. N yifuxin yi lu. 
Koni e yi furaxi waxatin naxan yi, n yi n maxidima sunun nin. N yi n yɛtɛ magodo sun suxuni. N ma maxandi xuiin to mi yabi, 
n sunuxin yi lu e fe ra alo n xɔyina hanma alo ngaxakedenna nan yi e ra nun. N xun sinxin yi lu nimisani alo n nga nan yi a ra. 
Koni tɔrɔn to n tan li, e birin yi ɲaxan. E e malan n xili ma. N yɛngɛfane, n mi yi naxanye kolon, ne yi lu n tɔrɛ tun! 
E n naɲaxu, e n magele. E e ɲinne raxinma n xili ma. 
Marigina, i yɛɛn sama e xɔn han waxatin mundun yi? N niin natanga e yɛngɛni, i n nakisi yatani itoe ma! 
Nayi, n barikan birama nɛn i xa yamani. N ni i matɔxɔ e birin yɛtagi. 
I nama tin n yaxu wuledene yi ɲaxan n ma fe ra. Naxanye n naɲaxuxi fuuni, ne nama gele n ma. 
E mi ngaxakedenya fala tima, fɔ e yi bɔɲɛ xunbelitɔne kansun wulen na. 
E feene falama n xun ma, e sɔnxɔ, e naxa, “Yɔ! I naxan ligaxi nxu bata a to!” 
Alatala, i tan bata ne to, nayi, i nama i dundu. Marigina, i nama i makuya n na! 
Marigina, keli, i yi n xun mayɛngɛ. N ma Ala, n ma yɛngɛn so. 
Alatala n ma Ala, yoon fi n ma bayo i tinxin. I nama tin n yaxune yi ɲaxan n ma fe ra. 
I nama tin e yi a fala, e naxa, “Yɔ! Nxu bata a manɔ! Nxu yi waxi na nan tun xɔn ma!” 
Muxun naxanye sɛwama n tɔrɔ feen na, Ala xa ne rayagi, a e yifu. Ala xa ne rayagi, a yi e rayarabi naxanye e yɛtɛ yitema n ma. 
Naxanye waxi n xɔrɔyaxin to feni, ne xa sɔnxɔ sɛwani, e naxa, “Alatala gbo! A bata sɛwa a walikɛna yɛɛ ra sigan na.” 
Nayi, n ni i ya tinxinyana fe falama nɛn, n yi i tantun fɛriɲɛn gbɛn!