Yaburina.
39.
Dawudaa bɛtina, bɛti baane kuntigin xa, Yedutun xa. 
N bata a fala, n naxa, “N na n kɛwanle rakɔrɔsima nɛn, alogo n dɛ xuiin nama n bira yulubini. N mi fa fala yo tiyɛ muxu ɲaxine yɛɛ xɔri.” 
N yi n dundu, n yi n naxara, n mi yi fala yo tima hali fe faɲina, koni n ma sɔxɔlɛn yi siga fari sɛ tun! 
N bɔɲɛn yi wolon n kui. N to yi n mirima a ma, a yi n kuiin gan fɔlɔ alo tɛɛna. N yi falan ti fɔlɔ, n naxa, 
“Alatala, n siin soge dɔnxɛn yita n na e nun a yatɛ saxina. I xa n nakolon a n ma siimayaan mi buma.” 
I tan nan n ma lɔxɔne yatɛn nadungixi ayi. Sese mi n siin waxatin na i yɛɛ ra yi. Adamadiin birin buma nɛn alo foyedin gbansan! 
Nininna nan gbansan a tan na. Muxuna a masigama, a feen ligama koni fuyan! A nafunla malanma, koni naxan a sɔtɛ a xanbi a mi na kolon. 
Marigina, n fa n xaxili tima nanse ra nayi? N na n yigin sama i tan nan yi. 
N nakisi n yulubin birin ma. I nama tin daxune yi gele n ma. 
N yi dunduxi nɛn. N mi yi fala yo tima. Amasɔtɔ i tan nan ito ligaxi n na. 
I ya furen ba n ma, benun i xa n naɲan tɔrɔni. 
I muxun maxadima a hakɛna fe ra i yi a hakɛn saran a ra. I muxuna nafunle kalama alo xiine. Adamadi yɛtɛɛn ligaxi nɛn alo foyedina. 
Alatala, n ma maxandi xuiin mɛ. I yi i tuli mati n ma mawuga xuiin na. N na wuga, i nama i dundu. I ya xɔɲɛn nan tun n tan na sigatini, alo n benbane yi kii naxan yi. 
N yiba singen alogo n xa sɛwa benun n xa dangu, benun n xa faxa.