Yaburina.
42.
Koraa diine fala ɲaxumɛna. Bɛti baane kuntigin xa. 
Ala, i xɔnla n niin suxuma alo ige xunbenla xɔnla xɛnla suxun kii naxan yi. 
Habadan Ala xɔnla n niin suxuma nɛn alo min xɔnla. N sigama waxatin mundun yi n sa ti Ala yɛtagi? 
N wugama kɔɛɛn nun yanyin na. N baloma yɛɛgen nin. N yaxune n maxɔdinma waxatin birin e naxa, “I ya Ala minɛn yi?” 
Waxati danguxine fe na rabira n ma, n bɔɲɛn yi kala. Nxu nun yamaan nan yi sigama Alaa banxini, n yi tima e yɛɛ ra, e sɛwaxin sɔnxɔma, e barikan birama Ala xa ɲaxan nin. 
Nanfera n niin sɔxɔlɛxi? Nanfera n bɔɲɛn sunuxi? N xa n yigi sa Ala yi. N mɔn a tantunma nɛn. N kisi muxun nun n ma Ala nan a ra. 
Koni iki, n niin sɔxɔlɛxi, nanara n na n mirima i ma Yurudɛn bɔxɔni, Xerimon geyane xuntagi, e nun Misari geyaan ma. 
Fufaan sama fufaan fari n xili ma, igen xuxu xuiin yi gbo ayi a surundeni. I xunfan gbeene radangu n xun ma, gbalon yi keli n xili ma alo walanna. 
Alatala xa a hinanna mayita yanyin na alogo n yi xi bɛtin bɛ a xa kɔɛɛn na. N ma dunuɲa yi gidin Ala nan maxandima. 
N na a falama n natangamana Ala nan xa, n naxa, “Nanfera i ɲinanxi n xɔn ma? Nanfera n luma tɔrɛ n yaxune yii?” 
N niin tɔrɔxi n yaxune xɔn amasɔtɔ e fɛriɲɛnma n maxɔdinɲɛ nɛn, e naxa, “I ya Ala minɛn?” 
Nanfera n niin sɔxɔlɛxi? Nanfera n bɔɲɛn sunuxi? N xa n yigin sa Ala yi. N mɔn a tantunma nɛn n ma Ala, n nakisimana.