Yaburina.
45.
Koraa diine fala ɲaxumɛna, bɛti baane kuntigin xa. A xa ba alo bɛtin naxan xili: “Fuge Faɲine.” Xanuntenya sigina. 
Fala faɲine bata n bɔɲɛn nasɛwa. Nanara, n bɛtini ito bama mangan xa. N dɛni xaxi bɛtina fe ra alo sɛbɛli ti faɲina xayen kii naxan yi. 
I tofan adamadiine birin xa, i fatan fala ɲaxumɛn tiyɛ, bayo Ala i barakama nɛn habadan! 
I ya silanfanna sɔti i dɛxɔn, sɛnbɛmana. Xunnayerenna nun binyena i tan nan xa! 
Siga soon fari xunnayerenni, i sa nɔɔn ti ɲɔndin nun yɛtɛ magodon nun tinxinyana fe ra. I fangan xa fe magaxuxine makɛnɛn! 
I ya xalimakuli ralemunxine xa i yaxune bɔɲɛne yisɔxɔn. Siyane birama nɛn i sanne bun. 
Ala, i luma nɛn i ya mangaya gbɛdɛni habadan! I ya mangaya taxamasenna nan tinxinyaan na. 
Tinxinna nan nafan i ma. A ɲaxin mi rafan i ma. Na nan a toxi Ala, i ya Ala bata i sugandi. A mɔn bata i ya sɛwan fari sa dangu bonne ra. 
Latikɔnɔnna nun se xiri ɲaxumɛne i ya dugine yi. Maxa se maxane i rasumunma mangane banxine yi naxanye maxidixi sama ɲinne ra. 
Mangane dii tɛmɛne ɲaxalandi tiine yɛ. I ya batɛn tixi i ya mangaya gbɛdɛn yii fari fɔxɔni. A maxidi seene rafalaxi xɛma faɲin nan na. 
Mangana ɲaxalandina, i tuli mati n ma falan na. Ɲinan i kon kaane nun i bari bodene xɔn ma. 
I xɔnla bata mangan suxu i ya tofanna fe ra. I ya kuntigin na a ra, i xa a binya. 
Tire kaane fama kiseene ra i xa nɛn. Nafulu kanne i ya fanna fenma nɛn. 
Binyen birin mangana dii tɛmɛn xa mangayani. A doma gbeen nafalaxi xɛma dugin nan na. 
E nun a doma rayabuxin nan sigan mangan fɛma ɲaxalandi tiine biraxi a fɔxɔ ra a tideni. 
E so mangana genla ma sɛwan nun ɲaxan nin. 
I tan mangana, i dii xɛmɛ wuyaxi sɔtɔma nɛn naxanye luma mangayani i benbane funfuni. I e findima kuntigine ra nɛn bɔxɔn birin xun na. 
N ni i findima xili kanna ra habadan. Muxun birin i matɔxɔma nɛn habadan han habadan.