Yaburina.
48.
Koraa diine bɛtina. Sigi sariɲanxina. 
Alatala gbo, a lan a xa matɔxɔ a gbee taani geya sariɲanxin fari. 
Siyon, Alaa geyana, a mate, a tofan, dunuɲa birin sɛwama a fe ra. A mate alo bɔxɔne birin manga taana Manga Gbeen dɔxi dɛnaxan yi. 
Ala a yengi sama nɛn a taa makantanxin xɔn, a bata a yɛtɛ findi a kantanmaan na. 
Mangane to e malan Siyon yɛngɛ xinla ma, 
e yi a to, e kabɛ, e gaxu, e yi e gi. 
Xuruxurunna nun kuisanna yi e suxu na, alo ɲaxanla kuiin na keli a ra, 
alo kunkibane na kɔntɔfili foye gbeena fe ra. 
Ala kabanako feen naxanye ligaxi, nxu bata ne mɛ. Iki, nxu bata ne to Alatala Sɛnbɛn Birin Kanna taani. A na taan nakisima nɛn habadan! 
Nanara, Ala nxu nxu mirima i ya hinanna ma i Batu Banxini. 
I tan xili kanna tantunma dunuɲa yiren birin yi. I mangayaan ligama tinxinyaan na. 
Yamaan xa ɲaxan Siyon geyaan fari, Yuda taa kaane xa sɛwa i ya kitisana fe ra! 
Ɛ bilin Siyon ma, ɛ yi a kondene yatɛ. 
Ɛ ɛ xaxili lu a yinna xɔn ma, ɛ mɔn yi a sangansone mato, nanara ɛ a falɛ mayixɛtɛ famatɔne xa, ɛ naxa, 
“Ala ito, nxɔ Ala na a ra habadan! A tima nxu yɛɛ ra nɛn han a raɲanni.”