Yaburina.
52.
Dawudaa fala ɲaxumɛna, bɛti baane kuntigin xa. 
A naxan ba, Dowegi Edɔn kaan to siga Sɔli fɛma, a naxa, “Dawuda bata siga Aximeleki a banxini.” 
Ee! Muxu gbeena! Nanfera i kanbama i ya fe ɲaxine yi? Alaa hinanna luma nɛn habadan! 
I feene yitɔnma bonne kala xinla ma. I lɛnna luxi nɛn alo filɛ xɛnxɛna. Ee! Yanfantenna! 
Fe ɲaxin nafan i ma dangu fe faɲin na. Wulen nafan i ma dangu ɲɔndin na. 
Ee! Wuledena! Fala xɔlɛne rafan i ma! 
Nanara, Ala i raxɔrima nɛn habadan! A i suxuma nɛn, a i ba i konni. A i bama nɛn kɛndɛ muxune yɛ dunuɲa yi. 
Tinxin muxune ito toma nɛn, e gaxu. Nayi, e gelema i ma nɛn, e naxa, 
“Na xɛmɛn mato, naxan mi Ala findi a kantanmaan na. Koni a yigin saxi a nafulu gbeen nin. A fangan sɔtɔxi a boden kalan nan xɔn.” 
Koni, n tan luxi nɛn alo Oliwi wudin naxan sabatima Alaa banxini. N yigin saxi a hinanna nin habadan han habadan! 
N ni i tan Ala tantunma nɛn i ya wanla a fe ra habadan! N ni i xinla binyama nɛn i ya tɔgɔndiya muxune yɛ, bayo i tan fan!